गेले दोन-तीन दिवस मुसळधार पाऊस सुरू असून मुंबई-गोवा चौपदरी राष्ट्रीय महामार्गावरील कशेडी घाटात खेड तालुक्याच्या हद्दीत भुयारी मार्गाच्या सुमारे आधी 200 मीटर अंतरावर दरड कोसळली. ही घटना रविवारी सायंकाळी उशिरा घडली. यामुळे काही काळ महामार्गावरील वाहतूक विस्कळीत झाली होती.
गेल्या महिन्यातसुद्धा या ठिकाणी दरड कोसळून वाहतुकीचा खोळंबा झाला होता. रविवारी सायंकाळी पुन्हा दरड कोसळल्याने वाहतूक विस्कळीत झाली. त्यामुळे मुंबईच्या दिशेने जाणारी वाहतूक एकाच लेनवरून सुरू ठेवण्यात आली. जवळपास दीड तासानंतर दरड हटविण्यासाठी यंत्रणा पाठवून दरड हटविण्याचे काम सुरू करण्यात आले. दरम्यान, या घटनेची माहिती मिळताच पोलिसांनी घटनास्थळी धाव घेत वाहतूक सुरळीत केली.
वाळंजवाडी हायवेच्या पुलाला दोन्ही बाजूने तडे, पूल धोकादायक
मुंबई-गोवा महामार्गावर कळंबणी येथे रस्ता खचल्याची घटना घडली आहे. वाळंजगाडी येथील ओढय़ावरील पुलाच्या दोन्ही बाजूला काँक्रीटला मोठे तडे गेले असून रस्ता खचायला सुरुवात झाली आहे. वाहतुकीला मोठा धोका निर्माण झाल्यामुळे रस्ता तत्काळ बंद करण्याची गरज निर्माण झाली आहे. स्थानिकांनी खबरदारी म्हणून महामार्गावर झाडाच्या फांद्या टाकल्या आहेत. ही घटना तीन-चार दिवसांपूर्वी घडली असली तरी आज रात्रीपासून परिस्थिती अधिक बिकट झाली आहे. मौजे कळंबणी बुद्रुक हद्दीमध्ये वाळंजवाडी येथे हायवेच्या पुलाच्या दोन्ही बाजूने तडे, पूल धोकादायक बनला आहे. हायवेवर वाहतूक ठप्प होण्याची शक्यता आहे.
खेड शहराचा पाणीपुरवठा बंद
मुंबई महामार्गावरील जगबुडी पुलाखालील पाण्याची मेन पाईपलाईन नादुरुस्त झाली होती. त्याच दिवशी मेन लाईनचे दुरुस्तीचे काम करण्यात आले होते. परंतु पावसामुळे जगबुडी नदीच्या पाण्याची पातळी वाढल्यामुळे व भरणा जॅकवेल येथील सतत विद्युत पुरवठा खंडित होत असल्याने मेन पाईपलाईन पुन्हा नादुरुस्त झाली आहे. सदर ठिकाणावरील नदीच्या पाण्याची पातळी कमी झाल्यानंतरच खंडित झालेल्या जलवाहिनीचे काम सुरू करणार आहे. जलवाहिनीचे काम करण्यास वेळ लागण्याची शक्यता असल्याने खेड शहराचा पाणीपुरवठा बंद झाला आहे.
Comment List