आंतरराष्ट्रीय क्रिकेट परिषदेने (आयसीसी) सोमवारी महिला वन डे क्रिकेट वर्ल्ड कपचे अधिकृत वेळापत्रक जाहीर केले. यजमान हिंदुस्थान आणि पाकिस्तान हे पारंपरिक कट्टर प्रतिस्पर्धी हायब्रिड मॉडेलनुसार 5 ऑक्टोबरला कोलंबोमध्ये (श्रीलंका) भिडतील. हिंदुस्थानला तब्बल 12 वर्षांनंतर महिला वन डे वर्ल्ड कपचे यजमानपद मिळाले आहे. याआधी हिंदुस्थानमध्ये 2013 साली अखेरचा महिला वर्ल्ड कप आयोजित करण्यात आला होता.
पहलगाम येथे झालेल्या अतिरेकी हल्ल्यानंतर हिंदुस्थानकडून प्रत्युत्तरादाखल पाकिस्तानात ‘ऑपरेशन सिंदूर’ राबविण्यात आले होते. त्यामुळे पाकिस्तानी संघाचे हिंदुस्थानात आगमन अशक्य असल्याचे चित्र आहे. त्यामुळे हिंदुस्थान-पाकिस्तान सामना तसेच पाकिस्तानचे इतर सामने श्रीलंकेतील कोलंबोमध्ये आयोजित करण्याचा निर्णय ‘आयसीसी’ने घेतला आहे. हायब्रीड मॉडेलनुसार पाकिस्तान संघाचे सर्व सामने श्रीलंकेतच होणार आहेत.
5 शहरांत 28 लीग अन् 3 नॉकआउट सामने
हिंदुस्थानच्या यजमानीत होणारा हा महिला वर्ल्ड कप बंगळुरू, इंदूर, गुवाहाटी, विशाखापट्टणम आणि कोलंबो या पाच ठिकाणी होणार आहे. या स्पर्धेत एकूण 28 लीग सामने आणि 3 नॉकआउट सामने खेळवले जातील. पहिला उपांत्य सामना 29 ऑक्टोबरला गुवाहाटी किंवा कोलंबो येथे (पाकिस्तानच्या पात्रतेवर अवलंबून) आणि दुसरा उपांत्य सामना 30 ऑक्टोबरला बंगळुरू येथे होईल. अंतिम सामना 2 नोव्हेंबर रोजी बंगळुरू किंवा कोलंबो येथे होणार आहे. यजमान हिंदुस्थान आणि श्रीलंका यांच्यात बंगळुरूच्या एम. चिन्नास्वामी स्टेडियमवर 30 सप्टेंबरला उद्घाटनाचा सामना रंगणार आहे. त्यानंतर 26 ऑक्टोबरला हिंदुस्थान-बांगलादेश यांच्यातील सामनाही बंगळुरू येथेच होईल.
पाकिस्तानचे सर्व सामने कोलंबोतच
पाकिस्तानी संघाचे सर्व सामने कोलंबो येथे होणार असून ते बांगलादेश (2 ऑक्टोबर), इंग्लंड (15 ऑक्टोबर), न्यूझीलंड (18 ऑक्टोबर), दक्षिण आफ्रिका (21 ऑक्टोबर) आणि श्रीलंका (24 ऑक्टोबर) या संघांविरुद्ध खेळतील. गतविजेता ऑस्ट्रेलिया संघ आपली मोहीम 1 ऑक्टोबरला न्यूझीलंडविरुद्ध इंदूरच्या होळकर स्टेडियमवर सुरू करणार आहे. त्यानंतर 8 ऑक्टोबरला कोलंबो येथे पाकिस्तानविरुद्ध सामना खेळेल. ऑस्ट्रेलिया-इंग्लंड सामना 22 ऑक्टोबरला इंदूरमध्ये होणार आहे.
फॉरमॅट तोच, फक्त विंडीज बाहेर
यंदाच्या महिला क्रिकेट वर्ल्ड कपचा फॉरमॅट 2022च्या वर्ल्ड कपप्रमाणेच असेल. आठ संघ राऊंड-रॉबिन फॉरमॅटमध्ये एकमेकांविरुद्ध खेळतील आणि अव्वल चार संघ उपांत्य फेरीत प्रवेश करतील. यजमान हिंदुस्थानसह ऑस्ट्रेलिया, इंग्लंड, न्यूझीलंड, दक्षिण आफ्रिका आणि श्रीलंका यांनी थेट पात्रता मिळवली होती. पाकिस्तान आणि बांगलादेश यांनी लाहोरमध्ये झालेल्या पात्रता स्पर्धेतून आपली जागा निश्चित केली.
Comment List