अहमदाबादमध्ये एअर इंडियाच्या विमानाला अपघात झालेल्या ठिकाणी रविवारी दुसरा ब्लॅक बॉक्स सापडला. ’एआय 171’ विमानाला अपघात कशामुळे झाला, हे शोधण्यासाठी अधिक तपास सुरु आहे. याचदरम्यान दुपारी विमानाचे अवशेष असलेल्या ढिगाऱ्यात दुसरा ब्लॅक बॉक्स सापडला. या बॉक्समुळे विमान अपघात घडण्यापूर्वीच्या क्षणांचा ऑडिओ डाटा तपास यंत्रणांच्या हाती लागणार आहे. दरम्यान, रविवारी गुजरातचे माजी मुख्यमंत्री विजय रुपाणी यांच्यासह 80 मृतांची ओळख पटवण्यात आली.
एअर इंडियाच्या ड्रीमलायनर विमानाला गुरुवारी भीषण अपघात झाला. त्यात जवळपास 300 लोकांचा मृत्यू झाला, तर कित्येक स्थानिक लोक जखमी झाले. अपघातामागे घातपात आहे का, याचा अधिक तपास सात यंत्रणांमार्फत सुरु आहे. विमानाचे अवशेष असलेल्या ढिगाऱ्यातून पुरावे गोळा केले जात असताना रविवारी दुपारी अपघातग्रस्त ’एआय 171’ विमानाचा दुसरा ब्लॅक बॉक्स हाती लागला. कॉकपिट व्हॉइस रेकॉर्डरमधून अपघाताच्या तपासात उपयुक्त ठरणारी माहिती हाती लागेल, असे पोलीस अधिकाऱ्यांचे म्हणणे आहे. तपास यंत्रणेने आधीच अपघात घडलेल्या इमारतीच्या छतावरून डिजिटल फ्लाइट डेटा रेकॉर्डर मिळवला आहे. दुसरा ब्लॅक बॉक्स सापडल्याने अपघाताच्या नेमक्या कारणाचा उलगडा करण्यात यश येणार आहे. दरम्यान, आतापर्यंत विजय रुपाणी यांच्यासह 80 मृतांचे डीएनए नमुने त्यांच्या नातेवाईकांच्या नमुन्यांशी जुळवून मृतदेहांची ओळख पटवण्यात आली आहे. दरम्यान, रुपाणी यांच्यावर पार्थिवावर सोमवारी त्यांच्या राजकोट येथील गावी शासकीय इतमामात अंत्यसंस्कार करण्यात येणार आहेत. या पार्श्वभूमीवर गुजरात सरकारने सोमवारी राज्यात दुखवटा जाहीर केला आहे.
Comment List