चंद्रपुरात पिसाळलेल्या हत्तींचा वृद्धावर हल्ला; वृद्धाचा जागीच मृत्यू

चंद्रपूर जिह्यात गेल्या काही दिवसांपासून दोन पिसाळलेल्या हत्तींनी धुमाकूळ घातला आहे. सिंदेवाही तालुक्यातील जाटलापूर गावालगत आज सकाळी या हत्तींनी एका वृद्धावर हल्ला करत त्याला चिरडले. यात वृद्धाचा जागीच मृत्यू झाला. दरम्यान, घटनेनंतर वन विभागाने दोन्ही हत्तींचा शोध घेणे सुरू केला आहे.

सिंदेवाही तालुक्यातील जाटलापूर गावातील काही शेतकरी धान पेरणीसाठी शेताकडे जात असताना आज सकाळी साडेसहाच्या सुमाराला गावालगतच्या जंगलातून अचानक दोन रानटी हत्ती बाहेर आले. त्यांनी शेतकऱयांचा पाठलाग करत त्यांच्यावर हल्ला करण्याचा प्रयत्न केला, मात्र शेतकरी पळून गेले आणि त्यांचा जीव वाचला. मात्र याच दरम्यान मारोती मसराम (60) हे शौचासाठी घराबाहेर आले होते. हत्तीने त्यांच्यावर हल्ला केला. लकवा झालेल्या मारोती यांना पळता आले नाही. हत्तीने त्यांना पायाखाली चिरडले तर दुसऱयाने सोंडेने उचलून जमिनीवर आपटले. यात त्यांचा जागीच मृत्यू झाला. त्यांच्या पश्चात पत्नी आणि पाच मुले असा परिवार आहे.

घुसखोर हत्तींचा ताबडतोब बंदोबस्त करा !

गडचिरोली जिह्यातून उमा नदी पार करत ताडोबा-अंधारी व्याघ्र प्रकल्पाच्या बफर क्षेत्रातून काही दिवसांपूर्वी दोन हत्तींनी घुसखोरी करत सिंदेवाही आणि सावली तालुक्त्यात प्रवेश केला होता. तेव्हापासून सिंदेवाही व सावली तालुक्यातील अनेक गावांमध्ये त्यांची दहशत निर्माण झालेली आहे. काही गावांमधील रहिवाशांवर हल्लेही केले होते. दरम्यान, या घटनेनंतर ग्रामस्थांत तीव्र संताप व्यक्त केला असून वन विभाग आणि प्रशासनाने या घुसखोरी केलेल्या हत्तींचा ताबडतोब बंदोबस्त करा, अशी मागणी ग्रामस्थांनी केली आहे.