शिवसेनेच्या महारक्तदान शिबिरात 3198 पिशव्या रक्त संकलन; विक्रोळीकरांचा उत्स्फूर्त प्रतिसाद

मुंबईतील रुग्णालयांमध्ये रक्ततुटवडा भासू नये तसेच रुग्णांना जीवनदान मिळावे या सामाजिक बांधिलकीतून विक्रोळी मतदारसंघात महारक्तदान शिबिराचे आयोजन करण्यात आले होते. या महारक्तदान शिबिराला विक्रोळीकरांनी उत्स्फूर्त प्रतिसाद दिला. शिबिरात 3 हजार 198 रक्तदात्यांनी सहभाग घेतला. विक्रोळी मतदारसंघाचे आमदार सुनील राऊत यांच्या मार्गदर्शनाखाली या रक्तदान शिबिराचे आयोजन करण्यात आले होते.

सामाजिक कार्यात आणि उपक्रमात शिवसेना कायमच एक पाऊल पुढे असते. ज्या ज्या वेळेस मुंबईत किंवा राज्याला जेव्हा रक्ताची गरज असते तेव्हा सर्वात जास्त रक्त संकलन शिवसेनेकडून केले जाते. रक्ताअभावी कोणाच्या जिवावर बेतू नये यासाठी आमदार सुनील राऊत यांनी विक्रोळीत महारक्तदान शिबिराचे आयोजन केले होते. शिबिरामध्ये मोठय़ा संख्येने सहभागी होऊन रक्तदान करा, असे आवाहन त्यांनी केले होते. त्यांच्या आवाहनाला उत्स्फूर्त प्रतिसाद देत हजारो विक्रोळीकरांनी रक्तदान केले.

शिबिरात सर्व वयोगटातील रहिवासी सहभागी झाले होते. शिबिरातून एकूण 3 हजार 198 रक्तदात्यांनी सामाजिक भान राखत रक्तदान केले. त्याचबरोबर रक्तदात्यांनी शिवसेनेच्या या सामाजिक उपक्रमाबद्दल सुनील राऊत यांचे आभार मानले. शिबिराला शिवसेना नेते सुभाष देसाई, विभागप्रमुख, माजी आमदार रमेश कोरगावकर, बाबा कदम, राजोल पाटील, परम यादव, सिद्धी जाधव, आनंद पाताडे, रश्मी पहुडकर, चंद्रशेखर जाधव, विश्वास शिंदे, नीलेश साळुंखे, संदीप सावंत, धर्मनाथ पंत, उत्तम कुराडे, शंकर ढमाले, सुषमा आमरे, दीपाली पाटील, दीपक सावंत, रवींद्र महाडिक, अभय राणे, किशोर पाटील, प्रकाश पुजारी, संतोष शिंदे, सुधाकर पेडणेकर, नीलेश पोहकर, सचिन मदने, विजय कुरकुटे, शिवसेनेचे विक्रोळीतील सर्व पदाधिकारी, शिवसैनिक उपस्थित होते.