आमच्यावर हल्ल्याचा प्रयत्न कराल, तर पूर्ण ताकदीने कारवाई करू! ट्रम्प यांची इराणला धमकी

आखातात युद्धजन्य परिस्थिती असतानाच अमेरिकेने युद्धाच्या भडक्यात आणखी तेल ओतले आहे. मधे पडाल तर महागात पडेल, असा सज्जड दम इराणने अमेरिकेला दिला होता. त्यावर अमेरिकेने जबरदस्त उत्तर दिले. आमच्यावर हल्ला करण्याचा प्रयत्न कराल तर अमेरिकन सैन्य त्याविरुद्ध पूर्ण ताकदीने कारवाई करेल. यापूर्वी कधी पाहिले नसेल आणि विचारही केला नसेल अशा परिणामांना तोंड द्यावे लागेल, अशी धमकी अमेरिकेचे राष्ट्राध्यक्ष डोनाल्ड ट्रम्प यांनी रविवारी इराणला दिली.

इस्रायल आणि इराण या दोन देशांतील संघर्ष विकोपाला गेला असतानाच त्यात अमेरिकेने लूडबूड सुरू ठेवली आहे. ट्रम्प यांच्या नाक खुपसण्याच्या भूमिकेवर इराणने शनिवारी सडेतोड इशारा दिला होता. त्यामुळे खवळलेल्या ट्रम्प यांनी रविवारी इराणला इतिहासात कधी पाहिले नसेल अशा भयंकर परिणामांना सामोरे जाण्यास तयारी ठेवण्याची धमकी दिली. इस्रायलने इराणवर केलेल्या हवाई हल्ल्यांमागे अमेरिकेचा हात आहे या कारणावरून इराणने इस्रायलला टार्गेट करण्याबरोबर अमेरिकेला निशाण्यावर ठेवले आहे. इस्रायलने रविवारी इराणच्या संरक्षण मंत्रालयाच्या मुख्यालयावर केलेल्या हल्ल्याशी आपला कोणताही संबंध नसल्याचा दावा ट्रम्प यांनी यावेळी केला.

इराण व इस्रायलमध्ये  करार करण्याचा प्रस्ताव

ट्रम्प यांनी इराण आणि इस्रायलमध्ये करार करण्याचा प्रस्तावही दिला. आपण इराण व इस्रायलमध्ये सहजपणे करार करू शकतो आणि रक्तरंजित संघर्ष संपवू शकतो, असे ट्रम्प यांनी सोशल मीडियातील पोस्टमधून स्पष्ट केले. तथापि, ट्रम्प यांच्या दुटप्पी भूमिकेमुळे इराणकडून अमेरिकेचा प्रस्ताव मान्य केला जाण्याची शक्यता धूसर आहे. अणुकरार केला नाही तर आणखी भयंकर हल्ले करू, असा इशारा ट्रम्प यांनी इराणला वारंवार दिला आहे.

लष्करी परेड, वाढदिवसावर ट्रम्प यांनी उडवले 350 कोटी

इस्रायल-इराणमधील संघर्षाच्या पार्श्वभूमीवर अमेरिकेचे राष्ट्राध्यक्ष ट्रम्प यांच्या भूमिकेकडे जगाचे लक्ष आहे. यादरम्यान अमेरिकेत ट्रम्प यांच्याविरुद्ध जनक्षोभ उसळला आहे. ट्रम्प यांनी त्यांचा वाढदिवस आणि अमेरिकन सैन्याच्या 250 व्या वर्धापन दिनाचे सेलिब्रेशन साजरे करताना तब्बल 350 कोटी रुपयांचा चुराडा केला. त्यांच्या या उधळपट्टीमुळे जनतेच्या संतापाचा भडका उडाला आणि ट्रम्प यांचा निषेध करण्यासाठी हजारो लोक रस्त्यावर उतरले.