महायुती सरकारने केलेल्या निकृष्ट बांधकामामुळे आज मालवणच्या राजकोटवरील छत्रपती शिवाजी महाराजांच्या पुतळय़ाच्या चबुतऱ्याची जमीन खचून मोठे भगदाड पडले. पुतळा भक्कम आहे, पण चबुतऱ्याच्या चिरेबंदी पायालाच तडे गेल्याने पुतळ्याच्या सुरक्षेबाबतही प्रश्न निर्माण झाला आहे. उद्घाटनानंतर अवघ्या महिनाभरातच हा प्रकार घडल्याने शिवप्रेमींमध्ये सरकारबद्दल प्रचंड संताप व्यक्त होत आहे.
मालवणच्या राजकोट किल्ल्यावर 4 डिसेंबर 2023 रोजी छत्रपती शिवाजी महाराजांच्या पुतळय़ाचे उद्घाटन पंतप्रधान नरेंद्र मोदी यांच्या हस्ते झाले होते, परंतु अवघ्या आठ महिन्यांत 26 ऑगस्ट 2024 रोजी तो 40 फुटांचा पुतळा कोसळून पडला होता. त्यानंतर महायुती सरकारने मोठा गाजावाजा करत नवा पुतळा उभारला. ज्येष्ठ व ख्यातनाम शिल्पकार राम सुतार यांच्या देखरेखीखाली हा पुतळा उभारण्यात आला. दहा फुटी चबुतऱयासह तो पुतळा 93 फूट उंच आहे. त्याचे उद्घाटन 11 मे रोजी मुख्यमंत्री देवेंद्र फडणवीस यांच्या हस्ते झाले होते. परंतु पुतळय़ाच्या उजव्या बाजूला चबुतऱयाजवळील जमिनीला भगदाड पडल्याने पुन्हा एकदा सरकारच्या निष्काळजीपणाचा पर्दाफाश झाला आहे. या घटनेचा व्हिडीओ सोशल मीडियावर व्हायरल झाल्यानंतर शिवप्रेमी आणि नागरिकांकडून सरकारवर टीका होत आहे. सरकारने योग्य खबरदारी घेऊन महापुरुषांचे पुतळे उभारावेत, अशी मागणी होत आहे.
कंत्राटदार आणि अधिकाऱ्यांवर कारवाई करा
शासनाने पुतळे उभारणीसाठी एक धोरण ठरवले पाहिजे. शिल्पकार, वास्तुविशारद, कलाकार, संशोधक, साहित्यिक, दूरदृष्टी असलेल्या व्यक्तींचा सल्ला घेतला पाहिजे, असे इंद्रजीत सावंत म्हणाले. याप्रकरणी संबंधित कंत्राटदार आणि अधिकाऱयांवर कठोर कारवाई व्हायलाच पाहिजे अशी मागणी करताना, आज मंत्रालयच पंत्राटदार चालवताहेत, ते फक्त चौरस फुटामध्ये फायदा किती मिळेल हेच बघतात, असा आरोपही इंद्रजीत सावंत यांनी केला.
किल्ल्यावरील पोलीस बंदोबस्त वाढवला
भगदाड पडलेल्या ठिकाणाच्या दुरुस्तीचे काम हाती घेण्यात आले आहे. तसेच किल्ल्यावरील पोलीस बंदोबस्त वाढवण्यात आला आहे. मुसळधार पाऊस होत असल्याने चबुतऱयाच्या जमिनीखालील माती वाहून गेल्याने भगदाड पडल्याचा दावा प्रशासन करत आहे. शिवरायांच्या पुतळ्याला कोणताही धोका नसल्याचा दावाही त्यांनी केला.
Comment List