गुजरातचे माजी मुख्यमंत्री आणि भाजपचे ज्येष्ठ नेते विजय रूपाणी यांचा अहमदाबाद येथील एअर इंडिया विमान दुर्घटनेत दुखद निधन झाले आहे. ही दुर्घटना 12 जून 2025 रोजी अहमदाबादच्या सरदार वल्लभभाई पटेल आंतरराष्ट्रीय विमानतळावरून लंडनला जाणाऱ्या एअर इंडिया फ्लाइट AI171 च्या उड्डाणानंतर काही मिनिटांतच घडली. या विमानात 242 प्रवासी आणि क्रू मेंबर्स होते, त्यापैकी 241 जणांचा मृत्यू झाला. विजय रूपाणी यांच्यावर 16 जून 2025 रोजी म्हणजेच सोमवारी राजकोटमध्ये शासकीय इतमामात अंत्यसंस्कार केले जाणार आहेत.
एअर इंडिया फ्लाइट AI171, एक बोईंग 787-8 ड्रीमलाइनर, अहमदाबाद विमानतळावरून दुपारी 1:38 वाजता लंडनच्या गॅटविक विमानतळाकडे निघाले होते. उड्डाणानंतर अवघ्या पाच मिनिटांतच विमान मेघाणी नगर परिसरातील एका निवासी भागात कोसळले, ज्यामुळे मोठी आग लागली. या दुर्घटनेत केवळ एक प्रवासी बचावला. विजय रूपाणी हे बिझनेस क्लासमधील 2D सीटवर बसले होते, अशी माहिती प्रवासी यादीतून समोर आली आहे.
विजय रूपाणी यांचे पार्थिव डीएनए चाचणीनंतर ओळखले गेले असून, त्यांचे पार्थिव अहमदाबादहून राजकोटला नेण्यात येणार आहे. गुजरात सरकारने 16 जून 2025 रोजी एक दिवसाचा राजकीय शोक जाहीर केला आहे. तसेच राजकोट आणि गांधीनगर येथे शोकसभांचे आयोजन करण्यात आले आहे
Comment List