रिक्षा न चालवता महिन्याला पाच लाख रुपये कमावणारे रिक्षाचालक पोलिसांच्या रडारवर, 12 जणांची चौकशी

मुंबईत महिन्याला पाच लाख रुपये कमावणाऱ्या रिक्षा चालक पोलिसांच्या रडारवर आले आहे. या प्रकरणी पोलिसांनी एका रिक्षाचालकासह 12 जणांची चौकशी केली आहे. मुंबईतील बीकेसी मधील अमेरिकन वकिलातीबाहेर व्हिसा अपॉईंटमेंटसाठी येणाऱ्या नागरिकांना आपल्या वस्तू आणि बॅग आत नेण्यास परवानगी नसते. तेव्हा वकिलाती बाहेर असलेले रिक्षाचालक त्यांच्या वस्तू आणि बॅगची देखरेख करतात. आणि त्याचे हजारो रुपये घेतात. अशा प्रकारे हे रिक्षाचालक महिन्याला पाच ते आठ लाख रुपये कमावत होते. आता पोलिसांनी या रिक्षाचालकांना चौकशीसाठी बोलवले होते.

व्हेन्युमाँक कंपनीचे सह-संस्थापक राहुल रुपाणी यांनी LinkedIn वर एक पोस्ट लिहून याबाबत माहिती दिली होती. यूएस कॉन्स्युलेटमध्ये व्हिसा अपॉईंटमेंटसाठी जाताना त्यांना आपली बॅग आत नेऊ दिली गेली नाही. अशा परिस्थितीत, कॉन्स्युलेटच्या बाहेर उभ्या असलेल्या एका रिक्षाचालकाने त्यांची बॅग एक हजार रुपये घेऊन सुरक्षित ठेवण्याची ऑफर दिली. अशा प्रकारे हे रिक्षा चालक महिन्याला रिक्षा न चालवता लाखो रुपये कसे कमावतात याची माहिती दिली होती.

व्हॉट अन् आयडिया! मुंबईतला रिक्षाचालक महिन्याला कमावतो 5 लाख

ही पोस्ट व्हायरल झाल्यानंतर मुंबई पोलिसांनी त्या रिक्षाचालकासह आणखी 12 जणांना चौकशीसाठी बोलावले होतं. हे सर्व जण अमेरिकन वकिलातीबाहेर ‘लॉकर’ स्वरूपात सेवा देत होते. BKC पोलिस ठाण्याच्या एका वरिष्ठ अधिकाऱ्याने दिलेल्या माहितीनुसार वकिलातीच्या परिसरात सुरक्षेच्या कारणास्तव पार्किंगसुद्धा बंदी आहे. रिक्षाचालकांना केवळ प्रवासी नेण्याची आणि आणण्याची परवानगी आहे. तसेच या रिक्षाचालकांकडे वकिलातीत आलेल्या लोकांच्या वस्तू आणि बॅग सांभाळण्याची कुठलाही परवानगी किंवा लॉकर सिस्टमचा परवाना नाही. त्यामुळे काहीजण तर जवळच्या दुकांनांमध्ये बॅगा ठेवत होते. या प्रकारामुळे कुठलीही वस्तू हरवल्यास किंवा संशयास्पद वस्तू आढळल्यास सुरक्षेच्या दृष्टीने गंभीर चूक ठरू शकते असे पोलिसांनी म्हटले आहे.