हिंदुस्थानचा भालाफेकपटू आणि ऑलिम्पिक सुवर्णपदकविजेता नीरज चोप्रा २० जूनला होणाऱ्या पॅरिस डायमंड लीगमध्ये प्रथमच सहभागी होणार आहे. आठ वर्षांनंतर नीरज या प्रतिष्ठेच्या स्पर्धेच्या पॅरिस टप्प्यात आपले कौशल्य पणाला लावणार आहे. सलग दोन स्पर्धांमध्ये उपविजेता ठरलेला नीरज यंदा विजेतेपदाच्या निर्धाराने मैदानात उतरेल.
गेल्या वर्षी ऑलिम्पिकच्या तयारीमुळे नीरजला पॅरिस लीगला मुकावे लागले होते. मात्र, यंदा तो पूर्ण ताकदीने या लीगमध्ये उतरणार आहे. नीरजने याआधी 2017 मध्ये ज्युनियर वर्ल्ड चॅम्पियन म्हणून पॅरिस डायमंड लीगमध्ये भाग घेतला होता. त्या वेळी त्याने 84.67 मीटर भालाफेक करत पाचवे स्थान पटकावले होते.
स्पर्धेच्या आयोजकांनी अद्याप सर्व स्पर्धकांची यादी जाहीर केलेली नसली, तरी त्यांनी नीरज आणि दोन वेळचा विश्वविजेता ग्रेनेडाचा अँडरसन पीटर्स यांचा सहभाग निश्चित केला आहे. हे दोघेही अशा पाच स्पर्धकांमध्ये आहेत, ज्यांनी याआधी 90 मीटरचा टप्पा पार केलेला आहे.
नीरजने 2025 सत्राची सुरुवात दक्षिण आफ्रिकेतील स्पर्धेत विजेतेपदाने केली होती. त्या स्पर्धेत त्याने 84.52 मीटरचा थ्रो केला होता. त्यानंतर दोहा डायमंड लीगमध्ये त्याने 90.23 मीटर फेकी करत 90 मीटरचा जादुई टप्पा पार केला. आता पॅरिस डायमंड लीगमध्ये नीरज नव्या विक्रमाच्या उद्देशाने उतरणार आहे.
Comment List