मणिपूरमध्ये सुरक्षा दलाला मोठे यश; 328 शस्त्रास्त्रांसह स्फोटके जप्त

मणिपूरमध्ये सुरक्षा दलांना मोठे यश मिळाले असूनमणिपूर पोलीस, केंद्रीय सशस्त्र दल, लष्कराचे जवान आणि आसाम रायफल्सच्या संयुक्त पथकांनी राज्यातील पाच खोऱ्यात शोध मोहीम राबवली. काही जिल्ह्यात बेकायदा शस्त्रे असल्याची माहिती मिळाल्यानंतर पथकांनी शोध मोहीम राबवली. या शोध मोहिमेत सुरक्षा दलांनी 328 शस्त्रांस्त्रांचा साठा, दारूगोळा आणि स्फोटके जप्त केली.

मे 2023 पासून जातीय आणि राजकीय अशांतता असलेल्या मणिपूरमध्ये शांतता प्रस्थआपित करण्याचे प्रयत्न सुरू आहेत. त्यात सुरक्षा दलाच्या शोध मोहिमेला मोठे यश मिळाले असून मोठ्या प्रमाणात शस्त्रसाठा आणि स्फोटके जप्त करण्यात आली आहेत. जप्त केलेल्या शस्त्रांमध्ये 151 एसएलआर रायफल्स, 65 आयएनएसएएस रायफल्स, 73 इतर रायफल्स, 5 कार्बाइन गन, 2 एमपी 5 गन, 12 एलएमजी रायफल्स, 6 एके-सिरीज रायफल्स, 2 अमोघा रायफल्स, 1 एआर-15 रायफल, 1 मोर्टार, 6 पिस्तूल, 2 बंदुकीच्या बॅरल्स आणि 2 फ्लेअर गन यांचा समावेश आहे. कारवाईदरम्यान जप्त केलेल्या स्फोटकांमध्ये 10 ग्रेनेड, तीन लेथोड्स, सात डेटोनेटर आणि तीन पॅरा शेल्सचा समावेश आहे.

सुरक्षा दलाच्या अधिकाऱ्यांनी नागरिकांना सतर्क राहण्याचे आवाहन केले आहे. तसेच बेकायदेशीर शस्त्रांशी संबंधित कोणत्याही संशयास्पद हालचाली किंवा माहिती जवळच्या पोलिस ठाण्यात किंवा केंद्रीय नियंत्रण कक्षाला कळविण्याचे आवाहन केले आहे.