सिल्लोड तालुक्यात वीज पडून 4 जणांचा मृत्यू; मृतांत दोन सख्ख्या भावांचा समावेश

सिल्लोड तालुक्यात वीज पडून चार जणांचा मृत्यू झाला असून मृतांत दोन सख्ख्या भावांचा समावेश आहे. या दुर्घटनेत चार जनावरेही दगावली आहेत. सिल्लोड तालुक्याला शनिवारी दुपारी वादळी वाऱ्यासह तुफान पावसाने झोडपून काढले. सारोळा येथे शेतात काम करत असतानाच यश राजू काकडे (वय – 14) आणि रोहित राजू काकडे (वय – 21) या दोघा भावांचा वीज पडून मृत्यू झाला. त्यांच्या पश्चात आई-वडील, आजी, आजोबा असा परिवार आहे.

मोढा बुद्रुक शिवारात वीज कोसळून रंजना बापूराव शिंदे (वय – 50) यांचा मृत्यू झाला. त्यांच्या पश्चात पती, दोन मुली, एक मुलगा असा परिवार आहे.

मौजे पिंपळदरी येथे शिवाजी सतीश गव्हाणे (वय – 30) याचा अंगावर वीज पडून मृत्यू झाला, तर त्याचा भाऊ जीवन गव्हाणे याचे दोन्ही पाय वीज पडल्याने निकामी झाले. त्याला उपचारासाठी रुग्णालयात दाखल करण्यात आले आहे. अन्वी शिवारात नारायण बांबर्डे यांची एक म्हैस तसेच मांडणा शिवारातील ज्ञानेश्वर लोखंडे यांची तीन वासरे वीज पडून ठार झाली.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.