तीर्थक्षेत्र शनिशिंगणापूर देवस्थानमधील वादग्रस्त अवांतर नोकरभरतीचा मुद्दा गाजत असतानाच, शनी मंदिरात मुस्लिम तरुणांच्या भरतीने संपूर्ण राज्यभर खळबळ उडाली होती. मंदिरातील कर्मचाऱ्यांची अनियमितता व हलगर्जीपणाचा ठपका ठेवत 167 कर्मचाऱ्यांवर कारवाई करत त्यांना शुक्रवारपासून सेवेतून बडतर्फ केले. दरम्यान, बडतर्फ केलेल्या कर्मचाऱ्यांमध्ये 114 मुस्लिम तरुणांचा समावेश आहे.
तीर्थक्षेत्र शनिशिंगणापूर देवस्थान विश्वस्त मंडळाची बैठक 12 रोजी संपन्न झाली. यामध्ये विविध विभागांतील कर्मचाऱ्यांना कायमचे काढून टाकण्याचा निर्णय घेण्यात आला. हिंदुत्ववादी संघटनेने उभारलेल्या आंदोलनाच्या पार्श्वभूमीवर मोठा निर्णय घेतला असल्याची चर्चा मंदिर परिसरात आहे. पवित्र शनी मंदिरात मुस्लिम कर्मचाऱ्यांना नोकरीवर घेण्यात आले होते. यामुळे अहिल्यानगर जिह्यासह राज्यभर खळबळ उडाली होती.
शनिशिंगणापूर देवस्थानमध्ये गेल्या चार-पाच महिन्यांपासून कर्मचाऱ्यांमध्ये अनियमितता व कामावर हजर न राहणे, याबाबी पुढे आल्याने मंदिरातील 167 कर्मचाऱ्यांना 12 जूनपासून कामावरून कमी करण्यात आले. तसे संबंधित कर्मचाऱ्यांना रजिस्टर नोटिसांमार्फत कळवले आहे, असे शनेश्वर देवस्थानचे कार्यकारी अधिकारी गोरख दरंदले यांनी सांगितले.
Comment List