Nagpur News – नागपूरमध्ये इलेक्ट्रीक सामानाच्या गोदामाला भीषण आग, दोघांचा मृत्यू; एक गंभीर जखमी

नागपूर शहरातील महाल परिसरात एका इलेक्ट्रिक सामानाच्या गोदामाला भीषण आग लागली. या आगीत गोदाम मालकासह दोघांचा होरपळून मृत्यू झाला तर एक जण गंभीर जखमी आहे. जखमीला उपचारासाठी रुग्णालयात दाखल करण्यात आले आहे. आगीची माहिती मिळताच अग्नीशमन दलाच्या चार गाड्या घटनास्थळी दाखल झाल्या. शनिवारी सायंकाळी ही आग लागली. अथक प्रयत्न करत अग्नीशमन दलाने आगीवर नियंत्रण मिळवले.

गिरीश खत्री आणि विठ्ठल धोते अशी मयतांची नावे आहेत तर गुणवंत नागपूरकर असे जखमीचे नाव आहे. गिरीश खत्री यांचे महल परिसरातील जुम्मा मस्जिदजवळ जय कॉम्प्लेक्समध्ये इलेक्ट्रीक दुकान आहे. या दुकानाच्या वरच्या फ्लॅटमध्ये इलेक्ट्रीक वस्तूंचे गोदाम आहे.

प्रत्यक्षदर्शींनी दिलेल्या माहितीनुसार, शनिवारी संध्याकाळी साडेसहाच्या सुमारास गोडाऊनमध्ये वेल्डिंगचे काम सुरू होते. यादरम्यान वेल्डिंगमधून निघालेली ठिणगी गोडाऊनमध्ये ठेवलेल्या फटाक्यांवर आणि इतर वस्तूंवर पडली, ज्यामुळे आगीने काही वेळातच भीषण रूप धारण केले. आगीमुळे परिसरात घबराट पसरली. अग्नीशमन दलाने तात्काळ घटनास्थळी धाव घेत आगीवर नियंत्रण मिळवले. स्थानिक पोलिसांनी घटनास्थळी दाखल होत परिस्थिती नियंत्रणात आणण्यात महत्वाची भूमिका बजावली.