Manali Zipline Incident – मनालीत झिपलाइन करताना केबल तुटली, 30 फूट उंचीवरून कोसळल्याने नागपूरची तरुणी गंभीर जखमी

मनालीत झिपलाइन करताना केबल तुटल्याने 30 फूट उंचीवरून खाली कोसळल्याने नागपूरची तरुणी गंभीर जखमी झाल्याची घटना समोर आली आहे. त्रिशा बिजवे असे जखमी तरुणीचे नाव आहे. त्रिशावर नागपूरमधील खासगी रुग्णालयात उपचार सुरू आहेत. या घटनेमुळे पर्यटन साहसी स्थळांवरील सुरक्षा नियमांबद्दल गंभीर चिंता निर्माण झाली आहे. कुटुंबीयांनी या अपघाताचा व्हिडिओ देखील त्यांनी शेअर केला आहे.

नागपूरमधील बिजवे कुटुंबीय उन्हाळी सुट्टीचा आनंद घेण्यासाठी 8 जून रोजी मनाली येथे गेले होते. यावेळी झिपलाइन करत असताना अचानक केबल तुटली आणि त्रिशा 30 फूट उंचीवरून खाली कोसळली. यात त्रिशाच्या पायाला फ्रॅक्चर झाले आहे. जखमी त्रिशाला मनाली येथील स्थानिक रुग्णालयात नेण्यात आले. तेथे प्रथमोपचार केल्यानंतर त्रिशाला चंदीगड येथील रुग्णालयात हलवण्यात आले. सध्या नागपूरातील खासगी रुग्णालयात त्रिशावर उपचार सुरू आहेत.

या अपघातप्रकरणी बिजवे कुटुंबाने साहसी खेळाच्या ठिकाणी अपुरी सुरक्षा व्यवस्था असल्याचा आरोप केला आहे. तसेच अपघातानंतर आपत्कालीन प्रतिसादाचा अभाव असल्याचेही त्यांनी अधोरेखित केले आहे.