श्री विठ्ठल रूक्मिणी मातेच्या दर्शनासाठी येणा-या भाविकांना सुलभ व जलद दर्शन मिळावे म्हणून मंदिर समितीच्या वतीने टोकन दर्शन प्रणालीची 15 जून रोजी प्रथम चाचणी घेण्यात येत आहे. त्या अनुषंगाने प्रथम चाचणी दिवशी सुमारे 1200 टोकन उपलब्ध होणार आहेत. भाविकांनी टोकन दर्शनाचे बुकींग मंदिर समितीच्या अधिकृत संकेतस्थळावरून करावे अशी माहिती मंदिर समितीचे सह अध्यक्ष गहिनीनाथ महाराज औसेकर यांनी दिली.
तिरुपती बालाजी येथे भाविकांना दर्शनासाठी टोकन पद्धतीचा वापर करण्यात येत आहे. पंढरपूर विठ्ठल मंदिराच्या इतिहासात पहिल्यांदाच टोकन दर्शन पद्धतीचा वापर करण्यात येणार आहे.
श्री विठ्ठल रूक्मिणी मातेच्या दर्शनासाठी येणा-या भाविकांना सुलभ व जलद दर्शन देण्यासाठी टाटा कन्सलटन्सी सर्व्हिसेस, बेंगलोर यांच्याकडून सेवाभावी तत्वावर टोकन दर्शन प्रणाली विकसित करून घेण्यात आली आहे. दरवर्षी वारकरी भाविकांची वाढती संख्या पाहता, भविष्यात दर्शन रांग आणि भाविकांच्या सोयींचे योग्य व्यवस्थापनावर काम करणे अत्यावश्यक आहे. या प्रणालीद्वारे भाविकांना आधीच दर्शनाची वेळ निश्चित करून दर्शनासाठी रांगेत न थांबता, ठरावित वेळेत दर्शनहॉलच्या माध्यमातून मंदिरात प्रवेश करता येणार आहे. ही प्रणाली विशेषत: गर्दीच्या काळात गर्दीचे व्यवस्थापन, भाविकांचा वेळ व श्रम वाचण्यास मदत होण्यास प्रभावी ठरणार आहे.
Comment List