बंगल्यात एकट्याच असलेल्या वृद्धाला चाकूचा धाक दाखवून सोन्याच्या दागिन्यांसह रोख रक्कम घेऊन पसार झालेल्या हेल्मेटधारी दोन चोरट्यांना अवघ्या बारा तासांत गुन्हे अन्वेषण शाखेच्या पथकाने गजाआड केले. चोरट्यांकडून 440 ग्रॅम सोन्याचे दागिने आणि 75 हजार रुपये रोख असा एकूण 50 लाख 25 हजारांचा मुद्देमाल हस्तगत केला. याप्रकरणी राजारामपुरी पोलीस ठाण्यात गुन्हा दाखल झाला असून, दिवसाढवळ्या चोरीचा प्रकार घडल्याने सर्वत्र खळबळ उडाली होती.
अमित शिंदे (25, रा. यादवनगर, डवरी वसाहत, कोल्हापूर), प्रकाश चौगुले (38, रा. हंचनाळ, ता. चिकोडी, जि. बेळगाव) अशी गजाआड केलेल्यांची नावे आहेत. उद्योजक राजीव पाटील (गोविंद सावंत हौ. सो., सम्राटनगर) यांनी याबाबत फिर्याद दिली होती.
अमित शिंदे हा फिर्यादी राजीव पाटील यांच्या घरी चालक म्हणून काम करत होता. कर्जबाजारी झाल्याने त्याने साथीदारासह मालकाच्याच घरात चोरी केल्याचे उघड झाल्याची माहिती अपर पोलीस अधीक्षक बी. धीरजकुमार यांनी पत्रकार परिषदेत दिली. यावेळी स्थानिक गुन्हे अन्वेषण शाखेचे पोलीस निरीक्षक रवींद्र कळमकर उपस्थित होते.
राजीव पाटील त्यांच्या बंगल्यात वयस्कर सासऱ्यांना ठेवून कुलूप लावून ते कामाच्या ठिकाणी जात. त्यांच्या गाडीवर आरोपी अमित शिंदे हा चालक म्हणून काम करत होता. यामुळे त्याचा पाटील यांच्या घरात नेहमी वावर असल्याने त्याला घराची संपूर्ण माहिती होती. बंगल्यात सासरे एकटेच असताना दुपारी सव्वा चारच्या सुमारास अमित शिंदे आणि त्याचा साथीदार प्रकाश चौगुले हे दोघे हेल्मेट घालून दुचाकीवरून आले. वयस्कर सासऱ्याला चाकूचा धाक दाखवून, ही चोरी केली. पुढे गोकुळ शिरगाव येथे दुचाकी एका पेट्रोल पंपावर सोडून तेथून चारचाकी घेऊन त्यांनी पोबारा केला.
घटनेची माहिती मिळताच राजीव पाटील यांनी राजारामपुरी पोलीस ठाण्यात धाव घेत, फिर्याद केली. त्यानंतर गुन्हे अन्वेषण शाखेच्या पथकाने सीसीटीव्हीची पाहणी केली. तसेच, मिळालेल्या माहितीनुसार वरील दोघे गोकुळ शिरगाव येथील लक्ष्मी टेकडी येथे येणार असल्याची माहिती मिळाली. यानुसार पोलिसांनी सापळा रचत दोघांना एका चारचाकी गाडीसह पकडले. गाडीच्या तपासणीवेळी त्यांना डिक्कीमध्ये सदरच्या मुद्देमालासह दोन बॅगा, चाकू, दोन हेल्मेट आणि रेनकोट असे एकूण 50 लाख 25 हजार रुपये किमतीचा मुद्देमाल मिळून आला. चौकशीवेळी दोघांनी चोरीची कबुली दिली.
Comment List