SA Vs AUS WTC Final 2025 – जोश हेझलवूड आणि मिचेल स्टार्कने 50 वर्षांपूर्वीचा विक्रम मोडला

लॉर्ड्सच्या ऐतिहासिक मैदानावर दक्षिण आफ्रिका आणि ऑस्ट्रेलिया यांच्यात World Test Championship 2023-25 च्या फायनलचा रणसंग्राम सुरू आहे. दोन्ही संघ जगज्जेतेपद पटकावण्यासाठी एकमेकांना कडवी झुंज देत आहेत. अशातच सामन्याच्या तिसऱ्या दिवशी ऑस्ट्रेलियाचे वेगवान गोलंदाज जोश हेझलवूड आणि मिचेल स्टार्क यांनी फलंदाजी करताना 50 वर्षांपूर्वीचा विक्रम मोडीत काढला आहे.

सामन्याच्या तिसऱ्या दिवशी ऑस्ट्रेलियाचा दुसरा डाव 207 धावांवर समाप्त झाला. त्यामुळे दक्षिण आफ्रिकेला आता जिंकण्यासाठी 282 धावांची गरज आहे. ऑस्ट्रेलियाचा दुसरा डाव समाप्त होण्यापूर्वी 148 या धावसंख्येवर ऑस्ट्रेलियाला 9वा हादरा बसला होता. मात्र त्यानंतर मिचेल स्टार्क आणि जोश हेझलवूड यांनी दहाव्या विकेटसाठी 59 धावांची ऐतिहासिक भागी केली. याचसोबत त्यांनी 50 वर्षांपूर्वीचा विक्रम मोडीत काढला. ICC फायनलमध्ये 10व्या विकेटसाठी सर्वाधिक धावांची भागी करण्याचा विक्रम आता मिचेल स्टार्क आणि जोश हेझलवूड यांच्या नावावर झाला आहे. यापूर्वी हा विक्रम 1975 साली वनडे वर्ल्डकपच्या फायनलमध्ये झाला होता. तेव्हा ऑस्ट्रेलियाच्याच डेनिस लिली आणि जेफ थॉमसन यांनी वेस्ट इंडिजविरुद्ध 10व्या विकेटसाठी 41 धावांची भागी केली होती.