पंजाब नॅशनल बँकेला मराठीचं वावडं, कोपरखैरणेमधील शाखेत RBI च्या नियमांचं उल्लंघन

रिझर्व्ह बँक ऑफ इंडियाच्या (RBI) निर्देशानुसार, हिंदुस्थानातील सर्व बँकांमध्ये त्रिभाषा सूत्र अवलंबिले जाते. म्हणजेच इंग्रजी, हिंदी आणि तिसरी त्या राज्याची राज्य भाषा. म्हणजेच महाराष्ट्रात मराठी भाषा. त्यामुळे बँकेतील सर्व फलक तीन भाषांमध्ये असणं बंधनकारक आहे. असे असताना नवी मुंबईतील कोपरखैरणे येथील पंजाब नॅशनल बँकेमध्ये मराठी भाषेला डावलून हिंदी आणि इंग्रजी भाषेमध्ये फलक लावण्यात आले आहेत. त्यामुळे पंजाब नॅशनल बँकेच्या कोपरखैरणे शाखेला RBI च्या नियमांचा विसर पडलाय का? असा प्रश्न निर्माण होत आहे.

माथाडी कामगारांसह सर्व सामान्य नागरिक कोपरखैरणेमध्ये मोठ्या संख्येने आहेत. त्यामुळे सर्वांनाच हिंदी किंवा इंग्रजी वाचता येत नाही. मराठीमध्ये व्यवहार करण्याला प्राधान्य दिलं जातं. असे असताना नवी मुंबईतील कोपरखैरणे सेक्टर-20 येथील पंजाब नॅशनल बँकेतील फलक हिंदी आणि इंग्रजीमध्ये असल्यामुळे ज्यांना लिहिता वाचता येत नाही अशा मराठी बांधवांना अडचणींचा सामना करावा लागत आहे. कॅश काउंटरवरील फलकासह काही फलक हे हिंदी आणि इंग्रजी भाषेमध्ये लावण्यात आले आहेत. जसे की, “क्या मैं आपकी सहायता कर सकता हूँ, “वरिष्ठ नागरिक काउन्टर, “कटे-फटे नोट एवं सिक्के यहां स्वीकार किये जाते हैं.” अशा पद्धतीने हे सर्व फलक फक्त हिंदी आणि इंग्रजीमध्ये लावण्यात आले आहेत. बँकेच्या ग्राहकांसाठी व्यवहाराच्या दृष्टीने हे तिन्ही काउंटर महत्त्वाचे आहेत. असे असताना या तिन्ही काउंटरवर मराठी भाषेचा समावेश नाही. त्यामुळे पंजाब नॅशनल बँकेच्या कोपरखैरणे शाखेला RBI च्या नियमांचा विसर पडलाय का? असा प्रश्न निर्माण होत आहे.