नामदेव ढसाळ यांच्यावरील ‘चल, हल्ला बोल या चित्रपटाला परवानगी नाकारणाऱ्या सेन्सॉर बोर्डाने चित्रपट प्रदर्शनाला अखेर परवानगी दिली आहे. जवळपास 11 महिन्यांनी या चित्रपटाच्या प्रदर्शनाला सेन्सॉर बोर्डाकडून परवानगी देण्यात आलेली आहे. परंतु यातील महत्त्वाची बाब म्हणजे या चित्रपटातील काही शब्दांवर मात्र आजही बंदी कायम असणार आहे. यामध्ये काॅम्रेड लाल सलाम, दलित या शब्दांवर बंदी कायम आहे. तसेच या चित्रपटाला प्रौढांसाठी असेल असे घोषित करण्यात आले आहे.
कोण नामदेव ढसाळ? असं विचारणाऱ्या सेन्सॉर बोर्डाविरुद्ध जोरदार एल्गार; नामदेव ढसाळांच्या कवितांचं वाचन
‘चल हल्ला बोल’ हा चित्रपट दलित पँथर चळवळीवर आधारित असून, हा चित्रपट प्रसिद्ध कवी नामदेव ढसाळ यांचा जीवनपट आहे. या चित्रपटातील नामदेव ढसाळ यांच्या कवितांवर सेन्सॉर बोर्डाने आक्षेप घेतला असून, चित्रपटा मध्ये शिवराळ भाषेचा उल्लेख आहे असे म्हटले होते. त्यामुळे हा वाद फार टोकाला पोहोचला होता. निर्माते आणि सेन्सॉर बोर्ड यांच्यातील हा वाद आता शमला आहे. हा चित्रपट 2024 ऑगस्ट पासून सेन्साॅर बोर्डाकडे प्रमाणपत्र मिळवण्यासाठी प्रलंबित होता.
वेब सीरीज किंवा इतर चित्रपटातील भाषेवर कुठलीही बंधनं नसताना या चित्रपटावर इतकी बंधनं का असा प्रश्न या चित्रपटाचे लेखक दिग्दर्शक महेश बनसोडे यांनी विचारला आहे. शब्दांवर घातलेल्या या बंदीमुळे तसेच चित्रपट फक्त प्रौढांसाठी असेल, यामुळे आता बनसोडे यांनी उच्च न्यायालयाचे दरवाजे ठोठावणार आहेत.
‘चल हल्ला बोल’ हा चित्रपट दलित पँथर तसेच युवा क्रांती दल यांच्यातील चळवळीवर बेतलेला चित्रपट आहे. परंतु सेन्साॅर बोर्डाने यातील शिवराळ भाषेवर आणि नामदेव ढसाळ यांच्या कवितांवर आक्षेप घेतला होता. कवितांमध्ये शिव्या आणि अश्लीलता असल्याचे सेन्साॅर बोर्डाने मत व्यक्त केले होते. नामदेव ढसाळांबद्दल माहीती देताच, कोण नामदेव ढसाळ असा प्रश्न सेन्साॅर बोर्डाकडून विचारण्यातही आला होता. “कोण ढसाळ? आम्ही ओळखत नाही”. या सेन्साॅर बोर्डातील अधिकाऱ्याच्या वक्तव्यामुळे दलित चळवळीतील कार्यकर्ते तसेच महाराष्ट्रातील जनतेकडूनही संताप व्यक्त करण्यात आला होता.
Comment List