RCB for sale! आयपीएल 2025 चा विजेता बंगळुरुचा संघ खरंच विकणे आहे? युनायटेड स्पिरिटनं दिलं स्पष्टीकरण

इंडियन प्रीमियर लीगच्या 18 व्या हंगामाचे विजेतेपद रॉयल चॅलेंजर्स बंगळुरू संघाने मिळवले. अंतिम लढतीत पंजाब किंग्जचा पराभव करत बंगळुरूने तब्बल 18 वर्षानंतर आयपीएल चषक उंचावला. या विजयानंतर आरसीबीच्या विक्रीची चर्चा सोशल मीडियावर सुरू झाली. आरसीबीची मालकी मॅकडोवल्स व्हिस्की तयार करणारी कंपनी युनायटेड स्पिरिट लि. कडे आहे आणि ही कंपनी आपली भागिदारी विकण्याच्या तयारीत असल्याची चर्चा सुरू झाली.

युनायटेड स्पिरिट लि. ही फरार उद्योजक विजय मल्ला याची कंपनी होती. मल्ल्या दिवाळखोरीत निघाला आणि त्याने ही कंपनी ब्रिटिश मद्य कंपनी डियाजियोला विकली. त्यामुळे डियाजियो कंपनी हिच आता रॉयल चॅलेंजर्स बंगळुरू संघाची मालक आहे. ही कंपनी आता आरसीबीतील आपली भागिदारी तब्बल 2 अब्ज डॉलर अर्थात 17 हजार कोटी रुपयांना विकणार असल्याचे समोर आले. या वृत्तामुळे युनायटेड स्पिरिट लि. कंपनीच्या शेअर्समध्येही मंगळवारी 3 टक्के वाढ झाली. त्यामुळे आयपीएल जिंकल्याचा फायदा उठवण्याचा कंपनीचा प्रयत्न असल्याची चर्चाही रंगली. मात्र, आता या चर्चा फक्त अफवा असल्याचे कंपनीने स्पष्ट केले असून असा कोणताही विचार नसल्याचे म्हटले आहे.

युनायटेड स्पिरिट लि. कंपनीने एक निवेदन जारी करत आरसीबीच्या विक्रीविषयी सुरू असल्याच्या वृत्तांचे खंडण केले आहे. याच संदर्भात बीएसई सर्व्हेलन्स डिपार्टमेंट आणि बॉम्बे स्टॉक एक्सचेंजने एक इमेल पाठवत कंपनीकडे स्पष्टीकरण मागितले होते. त्याला उत्तर देताना डियाजियोने म्हटले की, ’10 जून 2025 रोजी तुम्ही इमेल पाठवत आमच्याकडे आरसीबीतील भागिदारीच्या विक्रीसंदर्भात स्पष्टीकरण मागितले होते. त्यानुसार, आम्ही हे स्पष्ट करतो ही आरसीबीच्या विक्रीच्या बातम्या तथ्यांवर आधारित नाहीत. आमचा असा कोणताही विचार नाही.’ यावरून युनायटेड स्पिरिट लि. कंपनीची पॅरेंट कंपनी डियाजियो आरसीबीतील भागिदारी विकण्याच्या तयारीत नसल्याचे स्पष्ट होत आहे.