रेल्वे, एसटी, बस या सार्वजनिक वाहतूक व्यवस्थेमध्ये शालेय तसेच महाविद्यालयीन विद्यार्थ्यांना प्रवास करण्यासाठी किमान 50 टक्के सवलत सरकारकडून दिली जाते. मेट्रो हीसुद्धा सार्वजनिक वाहतूक व्यवस्था असून मुंबई आणि उपनगरात मेट्रो रेल्वेचे जाळे पसरले आहे. त्याचा वापर आणि फायदा रहिवाशांबरोबर शालेय तसेच महाविद्यालयीन विद्यार्थ्यांना व्हावा यासाठी मेट्रो प्रवासात शालेय-महाविद्यालयीन विद्यार्थ्यांना सवलत देण्यात यावी, अशी मागणी युवासेना सिनेट सदस्यांनी एमएमआरडीएकडे केली आहे.
मुंबईसह पूर्व आणि पश्चिम उपनगरात मेट्रोचे जाळे पसरले असून यातून मुंबईकरांना सुरक्षितपणे प्रवास करता येत आहे. मेट्रो ही लोकल, बेस्ट, एसटीप्रमाणेच एक सार्वजनिक वाहतूक व्यवस्था असल्यामुळे त्याचा फायदा हा विद्यार्थ्यांना व्हायला पाहिजे. याबाबत शिवसेना नेते, युवासेना प्रमुख-आमदार आदित्य ठाकरे यांच्याकडे पालक आणि विद्यार्थ्यांनी प्रवास सवलत देण्याची मागणी केली आहे. त्या पार्श्वभूमीवर युवासेना सिनेट सदस्य प्रदीप सावंत, व्यवस्थापन परिषद सदस्य शीतल शेठ-देवरुखकर, मिलिंद साटम, शशिकांत झोरे, माजी सिनेट सदस्य राजन कोळंबेकर यांनी एमएमआरडीए आयुक्तांना निवेदन दिले आहे. यात एमएमआरडीएनेदेखील इतर सार्वजनिक वाहतूक व्यवस्थेप्रमाणे मेट्रो रेल्वे प्रवासात सवलत देऊन विद्यार्थ्यांचा प्रवास सुकर करावा, अशी मागणी केली आहे.
Comment List