वाट चुकलेली माहीममधील चिमुकली धारावीत सापडली, पोलिसांच्या झटपट शोधामुळे आईच्या कुशीत विसावली

माहीमच्या नया नगरात राहणारी सहा वर्षांची मुलगी भावासोबत दूध आणण्यासाठी घराबाहेर पडली आणि हरवली. चालत ती माहीमहून थेट धारावीपर्यंत गेली. ती कुठेतरी बेपत्ता होण्याची दाट शक्यता होती. पण पोलिसांनी झटपट शोधमोहीम राबवून मुलाला सुखरूप शोधून काढली.

माहीमच्या रहेजा इस्पितळासमोरील नयानगर झोपडपट्टीत सितारा हासमी (33) ही तिचा पती व दोन मुलांसह राहते. सोमवारी सकाळी 9 वाजता सितारा हिचा मुलगा व सहा वर्षांची मुलगी असे दोघे दूध आणण्यासाठी घराबाहेर पडले. मुलगा घरी परतला, पण मुलगी त्याच्यासोबत आली नाही. त्यामुळे कुटुंबीयांनी तिचा शोध घेतला पण ती कुठेच मिळून आली नाही. त्यामुळे सितारा हिने माहीम पोलीस ठाणे गाठून मुलगी हरविल्याची तक्रार दिली. याची तत्काळ गंभीर दखल घेत परिमंडळ-5 चे उपायुक्त गणेश गावडे, माहीमचे वरिष्ठ निरीक्षक संजय पाटील यांच्या मार्गदर्शनाखाली चार पथकांनी मुलीचा शोध सुरू केला. परिसरातील सीसीटीव्ही चाळल्यावर मुलगी एकटीच धारावीच्या दिशेने पायी जात असल्याचे दिसून आले. त्यामुळे पोलिसांनी धारावीत शोध घेतला असता मुलगी धारावीच्या बडी मस्जिदसमोर मिळून आली. पावणेदोन वाजता मुलगी सापडली. तक्रार दाखल झाल्यापासून अवघ्या एका तासात मुलीला शोधून उपायुक्त गणेश गावडे यांनी तिला सितारा हिच्या ताब्यात दिले.