Chhatrapati Sambhajinagar News – वटपौर्णिमेची पूजा करायला गेल्या, दुचाकीवरून आलेल्या चोरट्यांनी हिसकावलं मंगळसूत्र

वटपौर्णिमानिमित्त राज्यात हिंदू महिलांचा उत्साह पाहायला मिळत आहे. सणानिमित्त वडाच्या झाडाची मनोभावे पूजा केली जाते आणि वडाला सात फेऱ्या मारल्या जातात. महिला साजशृगांर करुन सौभाग्याचं लेणं म्हणजेच मंगळसूत्र परिधान करतात. मात्र, छत्रपती संभाजीनगरमध्ये हेच सौभाग्याच लेणं चोरट्यांनी हिसकावल्याची घटना घडली आहे. दुचाकीवरुन आलेल्या भामट्यांनी एका महिलेचे मंगळसूत्र हिसकावून पळ काढला आहे. याप्रकरणी जवाहनगर पोलीस ठाण्यात गुन्हा दाखल करण्यात आला आहे.

शिवाजीनगर परिसरातील लक्ष्मीनगर भागात असलेल्या जानकी हॉटेलच्या पाठीमागे वटपुजेसाठी शोभा गोविंद होट्टे ही महिला जात होती. यावेळी दुचाकीवरुन आलेल्या दोघांनी शोभा होट्टे यांच्या गळ्यातील साडेतीन तोळ्याचे मंगळसूत्र हिसकावून पळ काढला. काळ्या टिशर्टवर आलेल्या या तरुणांनी रुमालाने तोंड बांधले होते. महिलेने आरडा-ओरड करेपर्यंत ते सुसाट पळून गेले. या घटनेची माहिती जवाहरनगर पोलीस ठाण्याचे पोलीस निरीक्षक अशोक शरमाळे यांना कळताच त्यांनी घटनास्थळी धाव घेतली. या परिसरातील सीसीटीव्ही फुटेजची तपासणी सुरू केली असून अधिक तपास पोलीस करत आहेत.

वटपौर्णिमेपूर्वी पत्नीपीडित पुरुषांचे पिंपळाला ‘उलटे फेरे’