Mumbai News – मोबाईल चोरीच्या संशयातून मित्रांकडून मित्रावर चाकूहल्ला, आरोपी अटक

मोबाईल चोरल्याच्या संशयातून दोन मित्रांनी तिसऱ्या मित्रावर चाकूहल्ला केल्याची घटना वडाळा येथे घडली. या हल्ल्यात पीडित तरुणासह एक आरोपी जखमी झाला आहे. जखमींना उपचारासाठी सायन रुग्णालयात दाखल करण्यात आलं आहे. फैजान शेख असे पीडित तरुणाचे नाव आहे. याप्रकरणी वडाळा टीटी पोलिसात गुन्हा दाखल करण्यात आला असून पोलिसांनी एका आरोपीला अटक केली आहे.

फैजान शेख, मोहम्मद हसनैन आणि आसिफ खान हे तिघेही जवळचे मित्र आहेत. तिघेही अँटॉप हिल परिसरातील रहिवासी आहेत. तिघेही मित्र ईद साजरी करण्यासाठी वडाळा परिसरात एकत्र भेटले होते. यावेळी आसिफ खानने त्याचा मोबईल जवळच्या दुकानात चार्जिंगला लावला होता. मात्र तो हे विसरला. मोबाईल सापडत नसल्याने फैजानने आपला मोबाईल चोरल्याचा संशय त्याला आला.

चोरीच्या संशयातून आसिफ आणि फैजानमध्ये जोरदार वाद झाला. त्यानंतर संध्याकाळी ते पुन्हा भेटले असता वाद आणखी वाढला. यानंतर आसिफने फैजानच्या पोटात धारदार शस्त्राने वार केला. या झटापटीत, आसिफच्या डोक्यालाही दुखापत झाली.

पोटात गंभीर दुखापत झाल्याने फैजानला सायन रुग्णालयात दाखल करण्यात आले. आसिफवरही वैद्यकीय उपचार सुरू आहेत. त्यामुळे पोलिसांनी त्याला अद्याप अटक केलेली नाही. मोहम्मद हसनैनला ताब्यात घेण्यात आले आहे. आसिफला डिस्चार्ज मिळाल्यानंतर त्याच्याविरुद्ध पुढील कारवाई केली जाईल असे पोलिसांनी सांगितले.