नियंत्रण सुटल्याने विद्यापीठाची बस उलटली, अपघातात 15 विद्यार्थ्यांचा दुर्दैवी मृत्यू

विद्यार्थ्यांना घेऊन जाणाऱ्या बस कारला धडक देत रस्त्याच्या कडेला पलटली. या अपघातात बसमधील 15 विद्यार्थ्यांचा मृत्यू झाला. अन्य 20 विद्यार्थी अपघातात जखमी झाले असून त्यांच्यावर रुग्णालयात उपचार सुरू आहेत. मलेशियातील पेराक येथे सोमवारी सकाळी ही दुर्दैवी घटना घडली. बसचालकाचे वाहनावरील नियंत्रण सुटल्याने हा अपघात घडल्याचे कळते. मलेशियाचे पंतप्रधान अन्वर इब्राहिम यांनी अपघाताच्या चौकशीचे आदेश दिले आहेत.

सदर बस तेरेन्गानू राज्यातील जेर्टेह येथून पेराकमधील तनजुंग मालीम येथील विद्यापीठाच्या मुख्य कॅम्पसकडे जात होती. बसमध्ये एकूण 48 विद्यार्थी होते. यादरम्यान पेराकच्या पूर्व-पश्चिम महामार्गावर बसने कारला धडक दिली. त्यानंतर बस रस्त्याच्या कडेला उलटली आणि अपघातग्रस्त झाली.

अपघातात 13 जणांचा जागीच मृत्यू झाला, तर इतर दोघांचा रुग्णालयात उपचारादरम्यान मृत्यू झाला. अपघातात 22 विद्यार्थी जखमी झाले असून यापैकी दोघांची प्रकृती गंभीर आहे. तर अन्य सहा विद्यार्थ्यांची प्रकृती स्थिर आहे. प्राथमिक तपासात बसचे अनियंत्रित झाल्याने हा अपघात घडल्याचे समोर येत आहे. मात्र अपघाताचा सखोल तपास सुरु आहे. हा अपघात नेमका कसा घडला? हे चौकशीअंती स्पष्ट होईल.