टेंभुर्णी- अकलूज मार्गावर दोन दुचाकींची धडक; तिघांचा मृत्यू, दोनजण जखमी

माढा तालुक्यातील टेंभुर्णीजवळ टेंभुर्णी अकलुज रोडवर मस्के वस्तीजवळ दोन दुचाकींची समोरासमोर धडक झाली. या भीषण अपघातात तीन तरुणांचा मृत्यू झाला असून दोनजण जखमी झाले आहेत. ही घटना रविवारी सायंकाळी 6 वाजण्याच्या सुमारास घडली आहे. या अपघातात ओंकार बाबासाहेब शिंदे (वय 18 वर्ष, रा. करकंब ता. पंढरपूर), प्रशांत कुंडलिक खडतरे (वय 22 वर्ष, रा. अकलूज ता.माळशिरस), निखिल अनिल वंजारे (वय 20 वर्ष, रा. करकंब ता. पंढरपूर) या तिघांचा मृत्यू झाला आहे.

सुरज अरुण लोखंडे (वय 18 वर्ष, रा.उपरी), दयावंत बंटी जाधव (वय 22 वर्षे, रा. अकलूज ता.माळशिरस), प्रशांत कुंडलिक खडतरे (वय 22 वर्ष रा. अकलूज ता.माळशिरस) हे तिघे मोटारसायकलने अकलूजच्या दिशेने जात होते. ते मस्के वस्तीजवळ आले असता अकलूजकडून ओंकार बाबासाहेब शिंदे व निखिल अनिल वजारे येत होते. त्यावेळी या दुचाकीची समोरासमोर जोरदार धडक झाली. या अपघातात प्रशांत कुंडलिक खडतरे या युवकाचा जागीच मृत्यू झाला. तर ओंकार बाबासाहेब शिंदे यांचा टेंभुर्णीत उपचार सुरू असताना मृत्यू झाला. तसेच निखिल अनिल वंजारी डोक्याला मार लागला असून त्याची प्रकृती चिंताजनक होती. त्याला सोलापूर येथील खाजगी रुग्णालयात दाखल करण्यात आले होते. तेथे उपचार सुरू असताना त्याची प्राणज्योत मालवली. या अपघातात सुरज अरूण लोखंडे आणि दयानंद बंडू जाधव हे किरकोळ जखमी झाले आहेत. सुरज लोखंडे यांनी टेंभुर्णी ठाण्यात रात्री उशीरा प्रशांत खडतरे व ओंकार शिंदे यांच्या विरोधात फिर्याद दाखल केली आहे. अधीक तपास पी.एस.आय मोरे तपास करीत आहेत .

वाढदिवसालाच झाला मृत्यू
या अपघातात प्रशांत कुंडलिक खडतरे याचा वाढदिवस होता. भावाचे लग्न असल्याने पत्रिका वाटपाचे कामासाठी ते सोलापूरला गेले होते. काम संपवून घराकडे निघाले होते. त्यावेळी परतताना अपघात झाला आणि वाढदिवसालाच त्याला मृत्यूने गाठले.