Ratnagiri accident – रत्नागिरीत गॅस टँकरची खासगी ट्रॅव्हल्सला धडक; वायू गळतीमुळं आग, घरं जळाली, 7 गंभीर जखमी

मुंबई-गोवा महामार्गावर चिपळूणहून रत्नागिरीकडे येणाऱ्या खासगी ट्रॅव्हल्सला सीएनजी टँकरने धडक दिल्याने भीषण अपघात झाला. या अपघातात खासगी ट्रॅव्हल्समधील सात गंभीर जखमी झाले आहेत. अपघातानंतर खासगी ट्रॅव्हल्स 20 फूट दरीत कोसळल्याने अनेकांना दुखापत झाली आहे.

रविवारी सकाळी आठ वाजता बावनदी येथील रस्त्यावर मागून भरधाव येणाऱ्या गॅस टँकरने खासगी ट्रॅव्हल्सला धडक दिली. खासगी ट्रॅव्हल्समधून शिक्षक प्रशिक्षणासाठी रत्नागिरीत येत असताना हा अपघात घडला.

मागून गॅस टँकरने धडक देताच खासगी ट्रॅव्हल्सच्या चालकाचे वाहनावरील नियंत्रण सुटले आणि खासगी ट्रॅव्हल्स दरीत कोसळली. ट्रॅव्हल्समधील सात शिक्षकांना गंभीर दुखापत झाली असून उर्वरित शिक्षकही जखमी झाले आहेत. जखमींना उपचारासाठी जिल्हा शासकीय रुग्णालयात दाखल करण्यात आले आहे.

गॅस टँकर रस्त्यावर पलटी झाल्यानंतर वायू गळती होऊन परिसरात आग लागली. काही झाडे आणि रिकामी घरे जळाली आहेत. प्रशासन आणि पोलीस यंत्रणा घटनास्थळी दाखल झाली आहे. जिल्हा पोलीस अधीक्षक नितीन बगाटे स्वतः घटनास्थळी उपस्थित असून संपूर्ण परिस्थितीवर नजर ठेवून आहेत.

दरम्यान, अपघातामुळे मुंबई-गोवा महामार्गावरील वाहतूक विस्कळीत झाली. सध्या ही वाहतूक पाली-संगमेश्वर मार्गे वळवण्यात आली आहे.