आश्चर्य! ऑनलाइन शॉपिंगमध्ये चंदिगड चमकले; दिल्ली, मुंबई, बंगळुरूला टाकले मागे

डिजिटलच्या जमान्यात आता देशभरात ऑनलाइन शॉपिंग केली जाते. देशात सर्वात जास्त ऑनलाइन शॉपिंग कुठल्या शहरात केली जाते तर मुंबई आणि दिल्ली हे शहरे अनेकांच्या डोळय़ांसमोर येतील, परंतु खरी परिस्थिती वेगळी आहे. चंदिगडने मुंबई, दिल्ली आणि बंगळुरूसारख्या टॉपच्या शहरांना मागे टाकून ऑनलाइन शॉपिंगमध्ये अव्वल क्रमांक पटकावला आहे. मिनिस्ट्री ऑफ स्टॅटिस्टिक्सच्या मॉडय़ुलर सर्व्हेनुसार, चंदिगडमधील 69 टक्के कुटुंबे हे नियमितपणे ऑनलाइन खरेदी करत आहेत, तर दिल्लीत केवळ 48.3 टक्के आणि मुंबईत 63 टक्के कुटुंबे ही नियमित ऑनलाइन खरेदी करत आहेत. चंदिगडमधील उच्च मध्यम वर्गीय लोकसंख्या आणि तुलनेने जास्त प्रति व्यक्ती उत्पन्न यामुळे ऑनलाइन खरेदीला चालना मिळाल्याचे बोलले जात आहे. चंदिगडप्रमाणेच गोव्यात 51.6 टक्के दादरा आणि नगर हवेली आणि दमण आणि दीव येथे 50.6 टक्के ऑनलाइन खरेदी केली आहे. मध्य प्रदेशात 17.9, उत्तर प्रदेशात 18.9, पश्चिम बंगालमध्ये 20.8 टक्के ऑनलाइन खरेदी केली आहे.

प्रति व्यक्ती उत्पन्न जास्त

चंदिगडमधील प्रति व्यक्ती उत्पन्न 3500 अमेरिकन डॉलर्सपेक्षा जास्त आहे. यामुळे या ठिकाणी सर्वात जास्त ऑनलाइन खरेदी केली जात आहे. दिल्ली आणि मुंबई यांसारख्या महानगरांना ऑनलाइन खरेदीत मागे टाकणे ही चंदिगडसाठी मोठी गोष्ट आहे. दिल्लीत एकूण खरेदी (अन्न आणि गैर-अन्न एकत्रित) मध्ये 78.2 टक्के कुटुंबे ऑनलाइन खरेदी करतात, तर चंदिगडमध्ये हा आकडा 71.5 टक्के इतका आहे. चंदिगडमधील ऑनलाइन खरेदीत कपडे, फॅशन ऍक्सेसरीज, इलेक्ट्रॉनिक्स आणि किराणा सामानाला सर्वाधिक मागणी आहे.