बनावट प्रमाणपत्रांच्या आधारे हृदयविकाराशी संबंधित उपचार आणि शस्त्रक्रिया करणाऱ्या डॉक्टरचा पर्दाफाश झाला आहे. प्रत्यक्ष MBBS ची डिग्री असताना स्वतःला हृदयरोग तज्ज्ञ असल्याचे भासवून या डॉक्टरने आतापर्यंत 50 हून अधिक रुग्णांवर हृदयरोग शस्त्रक्रिया केली आहे. यापैकी अनेक रुग्णांचा मृत्यू झाला आहे. एका पीडित रुग्णाच्या नातेवाईकांनी पोलिसात तक्रार दाखल केल्यानंतर या नकली हृदयरोग तज्ज्ञाची पोलखोल झाली. डॉक्टरविरोधात गुन्हा दाखल करण्यात आला असून पोलीस सखोल तपास करीत आहेत.
डॉ. पंकज मोहन शर्मा असे आरोपीचे नाव असून तो फरीदाबाद येथील बादशाह खान सिव्हिल रुग्णालय संचालित एका हार्ट सेंटरमध्ये काम करत होता. आरोपी एका कार्डिओलॉजिस्टचा रजिस्टर नंबर वापरत होता. तसेच त्याच्याकडे बनावट स्टॅम्पही होता. फरीदाबाद येथे ही घटना उघडकीस आली आहे.
एका रुग्ण नकली डॉ. शर्माकडे उपचार घेतल्यानंतर खरा कार्डिओलॉजिस्ट डॉ. पंकज शर्माकडे गेला आणि मेडिकल रिपोर्ट दाखवले. यानंतर खऱ्या डॉक्टरने मेडिकल रिपोर्टवरील आपला रजिस्ट्रेशन नंबर ओळखला. त्यानंतर आपले नाव, रजिस्ट्रेशन क्रमांक आणि कागदपत्रांचा गैरवापर होत असल्याचे डॉक्टरच्या लक्षात आले. यानंतर नकली कार्डिओलॉजिस्टचा पर्दाफाश झाला.
पोलिसात गुन्हा दाखल झाल्यानंतर नकली डॉ. शर्मा फरार आहे. पोलीस आरोपीचा शोध घेत आहेत. प्रकरणाचा सखोल तपास सुरू आहे.
Comment List