Megablock – रविवारी चाकरमान्यांचे ‘मेगा’ हाल! देखभाल दुरुस्तीच्या कामासाठी तिन्ही मार्गावर ब्लॉक

रविवारी घराबाहेर पडण्याचा विचार करत असाल तर आधी ही बातमी वाचा. उद्या (रविवारी) तिन्ही रेल्वे मार्गावर मेगाब्लॉक घेण्यात येणार आहे. यामुळे पश्चिम रेल्वे, मध्य रेल्वे आणि हार्बर रेल्वेमार्गावर देखभालदुरुस्ती आणि अभियांत्रिकी कामासाठी हा मेगाब्लॉक घेण्यात आला आहे. यामुळे काही गाड्यांचे मार्ग वळवण्यात आले आहेत तर काही लोकल रद्द करण्यात आल्या आहेत.

पश्चिम रेल्वे रेल्वेवरील मीरा रोड आणि भाईंदरदरम्यान मेट्रो-9 च्या गर्डर लाँचिंगसाठी शनिवार, रविवार आणि सोमवारी मध्यरात्री 12.45 ते पहाटे 3.15 वाजेपर्यंत ब्लॉक घेण्यात येणार आहे. यामुळे शनिवारी शेवटच्या दोन चर्चगेट-विरार गाड्या रद्द करण्यात आल्या आहेत. रविवारी सकाळी 10.35 ते दुपारी 3.35 या वेळेत मुंबई सेंट्रल ते चर्चगेट मेगाब्लॉक घेण्यात येणार आहे.

मध्य रेल्वेच्या मुख्य मार्गावरील विद्याविहार ते ठाणे स्थानकांदरम्यान सकाळी 8 ते दुपारी 1.30 वाजेपर्यंत पाचव्या आणि सहाव्या मार्गावर ब्लॉक घेण्यात येणार आहे. मेगाब्लॉकमुळे मध्य रेल्वेवरील अप आणि डाऊन मार्गावरील मेल, एक्सप्रेस गाड्या जलद मार्गावर वळवण्यात येतील.

हार्बर मार्गावरील पनवेल ते वाशी स्थानकांदरम्यान सकाळी 11.05 ते दुपारी 4.05 वाजेपर्यंत अप आणि डाऊन मार्गावर मेगाब्लॉक घेण्यात येणार आहे. यामुळे पनवेल-सीएसएमटीदरम्यानच्या सेवा रद्द करण्यात आल्या आहेत. तर ट्रान्स हार्बर मार्गावर ठाणे ते पनवेल डाऊन मार्गावरील सेवा सकाळी 10.01 ते दुपारी 3.20 वाजेपर्यंत आणि पनवेल ते ठाणे अप मार्गावरील सेवा सकाळी 11.02 ते दुपारी 3.53 वाजेपर्यंत रद्द करण्यात आली आहे.