मिंधे गटातील सुजाता शिंगाडे यांनी आज मातोश्री येथे शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्या उपस्थितीत शिवसेनेत पुन्हा प्रवेश केला. यावेळी त्यांनी मी माझ्या माहेरी परतले आहे, अशा भावना व्यक्त केल्य़ा.
”मी 30 जानेवारीला शिंदे गटात प्रवेश केला होता. ती माझी फार मोठी चूक होती. ओरिजिनल शिवसेना उद्धव साहेबांचीच शिवसेना आहे. मी सगळ्या पदांपर्यंत मातोश्रीमुळे पोहोचलेय. गेली पस्तीस वर्ष मी संघटनेसाठी काम करतेय. पण तिथे गेल्यावर चार महिन्यातच मला असा अनुभव आला की मी शिंदे गटात राहूच शकत नाही. अनेकदा रात्री मला झोप लागत नव्हती. आपण फार मोठी चूक केली आहे याची जाणीव होत होती. आमच्या विभागातील काही हेव्यादेव्यांमुळे रागाच्या भरात मी तिथे गेले त्यासाठी आता मी दिलगिरी व्यक्त करते. पुन्हा एकदा मी माझ्या माहेरी आले, माझ्या घरी परतले. आता खूप बरं वाटतंय. 35 वर्ष मी प्रामाणिकपणे संघटनेचं काम केलेलं आहे. आता कुणी तिथे जाऊ नये हे असं मला वाटतं. जे गेलेयत त्यांनीही परत यावं. कारण जे प्रेम मातोश्रीला मिळतं ते कुठेही मिळत नाही. दोन दिवसांपासून वहिणींनी मला इतकं सांभाळून घेतलं. आज त्या माँ साहेबांसारखीच जागा चालवत आहे”, असे सुजाता शिंगाडे म्हणाल्या.
”मी शिंदे गटात गेल्यानंतर कांदिवली चारकोप येथील 22 शाखांमध्ये मला मिटिंग घ्यायला लावल्या होत्या. तिथे एकही शाखाप्रमुख व्यवस्थित नाही, गटप्रमुख नाही. कुणाचा कुणाशीही ताळमेळ नाही. अंदाधुंदी कारभार सुरू आहे. मुख्यमंत्री झाल्यानंतर त्यांनी पैसे देऊन लोकांना विकत घेतलं. पैशाच्या आमिषाला बळी पडून लोकं तिथे गेली मात्र त्यांनाही आता पश्चाताप होतोय. शिंदे कुणाकडेही आता बघत नाहीए. मधले जे एजंट आहेत तेच लोकांना फसवतायत. मलाही त्यांनीच फसवलं आणि मी तिथे गेले’, असे शिंगाडे म्हणाल्या.
Comment List