40 लाखांचे रोख पुरस्कार असलेल्या ऑरियनप्रो आंतरराष्ट्रीय ग्रॅण्डमास्टर बुद्धिबळ स्पर्धेत जगभरातील 19 ग्रॅण्डमास्टरचा कस लागणार आहे. येत्या 16 ते 24 जूनदरम्यान कफ परेडच्या वर्ल्ड ट्रेड सेंटरमध्ये ही स्पर्धा खेळविली जाणार आहे.
ही बुद्धिबळ स्पर्धा एकंदर दोन गटांत खेळविली जाणार असून यात एक खुला गट असेल, ज्यात 19 ग्रॅण्डमास्टरसह 11 आंतरराष्ट्रीय मास्टर आणि 4 महिला आंतरराष्ट्रीय मास्टर खेळणार आहेत. या गटातील विजेत्यांना रोख 25 लाखांची बक्षिसे दिली जातील दुसरा गट 13 वर्षांखालील खेळाडूंचा असून यात 15 लाखांची बक्षिसे ठेवण्यात आली आहेत. ही ज्युनियर खेळाडूंची जगातील सर्वाधिक रकमेची स्पर्धा ठरली आहे.
या गटात हिंदुस्थानसह परदेशातील युवा बुद्धिबळपटू 7 वर्षांखालील. 9 वर्षांखालील, 11 वर्षांखालील आणि 13 वर्षांखालील अशा चार वयोगटात भाग घेतील.
हिंदुस्थानातील सर्वाधिक रकमेच्या या स्पर्धेत अव्वल तीन विजेत्यांना अनुक्रमे 4 लाख, 3 लाख आणि दोन लाख रुपयांचे बक्षीस मिळेल. ज्युनियर स्पर्धेतील विजेत्यांना अनुक्रमे तीन लाख, दोन लाख आणि एक लाख रुपयांचे भव्य बक्षीस देऊन गौरविले जाणार आहे हिंदुस्थानचा ग्रॅण्डमास्टर दिप्तयन घोषला ग्रॅण्डमास्टर स्पर्धेसाठी अव्वल मानांकन देण्यात आले आहे. जॉर्जियाचा ग्रॅण्डमास्टर लेवन पंतसुलिया आणि आर्मेनियाचा ग्रॅण्डमास्टर पेट्रोस्यान मॅन्युएल यांना अनुक्रमे दुसरे आणि तिसरे मानांकन लाभले आहे. ज्युनियर स्पर्धेत सहा देशांच्या खेळाडूंचा सहभाग असून मुंबईचा 12 वर्षीय फिडेमास्टर अंश नेरुरकरला अव्वल मानांकन देण्यात आले आहे.
Comment List