कुर्ला येथील मदर डेअरीची जागा उद्योगपती गौतम अदानी यांना देण्याचा निर्णय महायुती सरकारने घेतला. त्याविरोधात धारावीकरांमध्ये नाराजी आणि संतापाबरोबरच अस्वस्थताही आहे. मात्र धारावीकरांवर कोणत्याही परिस्थितीत अन्याय होऊ देणार नाही, धारावीकरांच्या हक्कासाठी शिवसेना मुंबईभर आंदोलन करेल, अशी ग्वाही शिवसेना पक्षप्रमुख उद्धव ठाकरे यांनी आज धारावीकरांना दिली.
धारावी बचाव आंदोलन कृती समिती आणि धारावीतील विविध सामाजिक संघटनांच्या पदाधिकाऱयांनी आज ‘मातोश्री’ निवासस्थानी जाऊन उद्धव ठाकरे यांची भेट घेतली. महायुती सरकारकडून धारावीकरांवर अन्याय होत आहे. त्याविरोधात लढा उभारण्यासाठी शिवसेनेचे सहकार्य आणि पाठिंबा कायम राहावा, अशी विनंती यावेळी उद्धव ठाकरे यांना करण्यात आली. उद्धव ठाकरे यांनी या पदाधिकारी आणि कार्यकर्ते यांच्याशी चर्चा केली. त्यांच्या भावना ऐकून घेतल्या. शिवसेना धारावीकरांच्या पाठीशी पूर्ण ताकदीने उभी होती आणि पुढेही राहील, अशी ग्वाही उद्धव ठाकरे यांनी दिली.
याप्रसंगी शिवसेना नेते, युवासेना प्रमुख, आमदार आदित्य ठाकरे, शिवसेना नेते-खासदार संजय राऊत, माजी खासदार विनायक राऊत, आमदार महेश सावंत, शिवसेना सचिव साईनाथ दुर्गे आदी उपस्थित होते.
शिवसेना धारावीकरांच्या पाठीशी नेहमीच पूर्ण ताकदीने उभी राहिली आहे आणि या पुढेही तुमच्या सोबत राहील. – उद्धव ठाकरे
Comment List