पैसा फेको, तमाशा देखो असं सध्याचं राजकारण, उद्धव ठाकरे यांचा निशाणा

“मला तुमचा अभिमान आहे. तुमच्यासारख्या सच्चा आणि निष्ठावंत शिवसैनिकांसाठीच मी लढतो आहे. आज कदाचित पराभव आपल्या पदरी पडला असेल पण उद्याचा दिवस आपला आहे.”

‘स्वार्थासाठी काहीजण दुसरीकडे गेले आणि माझ्याविरोधात बोलत आहेत. ‘पैसा फेको तमाशा देखो’ असं सध्याचं राजकारण झालं आहे,’ अशा शब्दांत शिवसेना पक्षप्रमुख उद्धव ठाकरे यांनी आज गद्दारांवर निशाणा साधला.

शिवसेना नेते अनंत गिते यांच्या 75 व्या वाढदिवसानिमित्त उद्धव ठाकरे यांनी त्यांना शुभेच्छा दिल्या. मातोश्री निवासस्थानी यावेळी रायगड जिह्यातील शिवसैनिक मोठय़ा संख्येने आले होते. त्यांना उद्धव ठाकरे यांनी मार्गदर्शन केले. रायगड जिल्हा हा शिवसेनेचा बालेकिल्ला आहे. या जिह्यात आपण नेहमीच जिंकत आलो आहोत. तिथे आपला खासदार होता, तीन-चार आमदारही निवडून यायचे. वर-खाली होतच असतं. वरती गेलं म्हणून डोक्यात हवा जाऊ द्यायची नसते आणि खाली आलो म्हणून नैराश्याने ग्रासून जायचे नसते. आपण कशासाठी काम करत आहोत हे एकदा डोक्यात असलं की बाकीच्या गोष्टी आपोआप सुटतात, असे सांगत उद्धव ठाकरे यांनी निष्ठावंत शिवसैनिकांची पाठ थोपटली.