भिवंडीतील बोरीवली गावात महाराष्ट्र दहशतवादविरोधी पथकाने (ATS) सोमवारी पहाटे छापा टाकला. या कारवाईत कुख्यात दहशतवादी साकिब नाचनच्या घराचीही तपासणी करण्यात येत आहे. एटीएसच्या या कारवाईच्या पार्श्वभूमीवर गावात कडक पोलीस बंदोबस्त ठेवण्यात आला आहे. भिवंडी तालुक्यातील बोरिवली गावात एटीएसचे मोठे सर्च ऑपरेशन सुरू आहे.
या कारवाईच्या पार्श्वभूमीवर संपूर्ण गावात पोलिसांचा मोठ्या प्रमाणात फौजफाटा तैनात करण्यात आला आहे. सध्या एटीएसची अनेक पथके पहाटेपासून अनेक संशयास्पद व्यक्तींच्या घरी जाऊन छापेमारी करत आहे. यामुळे गावाला छावणीचं स्वरूप आलं आहे. महाराष्ट्रात एटीएसकडून इसिसशी संबंधित कथित दहशतवाद्यांविरोधात मोठी कारवाई केली जात आहे. यात भिवंडी तालुक्यातील पडघा जवळील बोरिवली गावात सोमवारी पहाटेपासून एटीएसने छापा टाकला आहे.
एटीएसकडून सुरू असलेल्या या कारवाईदरम्यान 8 ते 10 संशयितांना ताब्यात घेण्यात आलं आहे. सध्या त्यांची कसून चौकशी सुरु आहे, अशी माहिती मिळाली आहे. तसेच साकिब नाचणच्या घराची तपासणी करण्यात आल्याचे समजत आहे. गावात ठाणे ग्रामीण, रायगड आणि ठाणे पोलीस दलातील कर्मचारी बंदोबस्तासाठी तैनात करण्यात आले आहेत.
बोरिवली गाव हे साकिब नाचण आणि इतर दहशतवाद्यांचा तळ म्हणून ओळखलं जातं. यापूर्वीही या गावातून अनेकदा दहशतवाद संबंधित कारवाईंमध्ये सहभागी असलेल्या व्यक्तींना ताब्यात घेण्यात आलं आहे. याच गावातून कुख्यात साकिब नाचण, त्याचा मुलगा आणि इसिसमधील दहशतवादी कृत्यांमध्ये सहभागी असलेल्या 16 जणांना अटक करण्यात आली होती.
Comment List