जवळपास तीन दशकांच्या संसारानंतर ऑस्ट्रेलियन अभिनेता हग जॅकमन आणि अभिनेत्री डेबोरा ली फर्नेस यांनी घटस्फोटासाठी अर्ज दाखल केला आहे. दोन वर्षांपूर्वी दोघे वेगळे झाले होते. त्यानंतर आता ते कायदेशीररीत्या घटस्फोट घेणार आहेत. जॅकमन आणि डेबोरा यांनी त्यांच्या मालमत्तेच्या विभाजनाबाबत एक करार केला आहे. ज्यामध्ये तब्बल 387 दशलक्ष डॉलर (जवळपास 3387 कोटी रुपये) संपत्तीचा समावेश आहे.
जॅकमन आणि डेबोरा या दोघांचा घटस्फोट अंतिम टप्प्यात असून त्यासाठी फक्त न्यायालयीन मंजुरीची आवश्यकता आहे. जॅकमन आणि डेबोरा यांना दोन मुले आहेत. ऑस्कर आणि आवा अशी त्यांची नावे आहेत, तर जिच्यासोबत जॅकमनच्या अफेअरच्या चर्चा आहेत, त्या सटॉन फॉस्टरने ऑक्टोबर 2024 मध्ये पती टेड ग्रिफिनला घटस्फोट दिला आहे. या दोघांना एक बाळ आहे. टेड हा पटकथा लेखक आहे.
घटस्फोटाचा अर्ज दाखल केल्यानंतर डेबोराने तिच्या भावना व्यक्त केल्या आहेत. विश्वासघाताच्या वेदनादायी प्रवासातून गेलेल्या त्या सर्वांबद्दल माझ्या मनात संवेदना आहेत. ही एक खोलवर झालेली जखम आहे, असे डेबोराने म्हटले. जॅकमनने मात्र या प्रकरणी मौन बाळगणे पसंत केले.
Comment List