त्रिखंड योगामुळे सिंहस्थ कुंभमेळा 22 महिन्यांचा, नाशिक आणि त्र्यंबकेश्वर कुंभ पर्वणीच्या तारखा जाहीर

नाशिक आणि त्र्यंबकेश्वर येथील सिंहस्थ कुंभमेळ्याला 31 ऑक्टोबर 2026 रोजी ध्वजारोहणाने सुरुवात होणार आहे. पहिले अमृतस्नान 2 ऑगस्ट 2027 रोजी, तिसरे अमृतस्नान नाशिकला 11 सप्टेंबर, तर त्र्यंबकेश्वरला 12 सप्टेंबरला होईल. कुंभ समाप्ती 24 जुलै 2028 रोजी होणार आहे. तब्बल 75 वर्षांनी येणाऱया त्रिखंड योगामुळे हा कुंभमेळा 12 ऐवजी 22 महिने राहील. मुख्य पर्वण्यांव्यतिरिक्त पर्वस्नानांचे एकूण 97 मुहूर्त पुरोहित संघाने या वेळी जाहीर केले.

जिल्हाधिकारी कार्यालयात रविवारी मुख्यमंत्री देवेंद्र फडणवीस यांच्या उपस्थितीत नाशिक, त्र्यंबकेश्वर येथील सर्व तेरा आखाडय़ांचे साधू, महंत यांची बैठक पार पडली. यात सिंहस्थ कुंभमेळ्याच्या तारखा निश्चित करण्यात आल्या.

या बैठकीस अखिल भारतीय आखाडा परिषदेचे अध्यक्ष महंत रवींद्रपुरी महाराज, जुना आखाडय़ाचे महंत हरीगिरी महाराज, महंत भक्तिचरणदास, कुंभमेळा मंत्री गिरीश महाजन, मंत्री दादा भुसे, नरहरी झिरवाळ, आमदार हिरामण खोसकर, सीमा हिरे, राहुल ढिकले, राहुल आहेर, विभागीय आयुक्त प्रवीण गेडाम, जिल्हाधिकारी जलज शर्मा, महापालिका प्रशासक मनीषा खत्री, पोलीस आयुक्त संदीप कर्णिक, विशेष पोलीस महानिरीक्षक दत्तात्रय कराळे, नाशिक पुरोहित संघाचे अध्यक्ष सतीश शुक्ल, त्र्यंबकेश्वर पुरोहित संघाचे अध्यक्ष मनोज थेटे आदी उपस्थित होते.

31 ऑक्टोबर 2026 रोजी गुरू सिंह राशीत प्रवेश करणार असून या दिवशी नाशिक, त्र्यंबकेश्वरला कुंभ पर्वाचे ध्वजारोहण होईल. त्यानंतर पहिले आणि दुसरे अमृतस्नान हे दोन्ही ठिकाणी सोमवार, 2 ऑगस्ट 2027 आणि मंगळवार, 31 ऑगस्ट 2027 रोजी होणार आहे. नाशिक येथे तिसरे अमृतस्नान शनिवारी, 11 सप्टेंबर 2027 ला, तर त्र्यंबकेश्वर येथे रविवारी, 12 सप्टेंबर 2027 ला होईल.

75 वर्षांनी त्रिखंड योग

सिंहस्थ कुंभमेळ्यातील गोदावरी स्नान व दर्शनाचे अनन्यसाधारण महत्त्व असते. या वेळचा कुंभमेळा हा त्रिखंडी असणार आहे. या काळात गुरू कर्क राशीतून सिंह, नंतर कन्या आणि पुन्हा सिंह राशीत प्रवेश करेल. त्यामुळे कुंभमेळा 22 महिने चालणार आहे. याआधी सन 1956च्या कुंभपर्वावेळी असा योग आला होता, अशी माहिती नाशिक येथील पुरोहित संघाचे अध्यक्ष सतीश शुक्ल यांनी दिली. नाशिक, त्र्यंबकेश्वर येथील पुरोहित संघांनी 22 महिन्यांमधील तीर्थस्नान, दर्शन व यात्रेचे एकूण 97 मुहूर्तही सांगितले. त्यात नाशिकच्या 44 आणि त्र्यंबकेश्वर येथील 53 पर्वस्नानांचा समावेश आहे.