‘ऑपरेशन सिंदूर’च्या यशाच्या पार्श्वभूमीवर भारतीय क्रिकेट मंडळाने आयपीएलच्या अंतिम सामन्यास तिन्ही सेनादलांच्या प्रमुखांना आमंत्रित केले होते. 3 जून रोजी अहमदाबाद येथे होणाऱया या सामन्यास उपस्थित राहण्यास त्यांनी नकार दिला आहे.
‘बीसीसीआय’कडून ऑपरेशन सिंदूरच्या यशाचा आनंदोत्सव अहमदाबाद येथे होणाऱया आयपीएलच्या अंतिम सामन्याच्यावेळी साजरा करण्यात येणार आहे. यावेळी ऑपरेशन सिंदूरच्या यशाचा आनंद साजरा करण्यासाठी लष्करप्रमुख उपेंद्र द्विवेदी, नौदल प्रमुख अॅडमिरल दिनेश के त्रिपाठी, हवाईदल प्रमुख एअर चीफ मार्शल प्रीत सिंग आणि भारतीय सशस्त्र दलातील उच्च अधिकारी आणि सैनिकांना आमंत्रित केले आहे. परंतु, तिन्ही सेनादलांच्या प्रमुखांनी सामना पाहण्यासाठी उपस्थित राहणार नसल्याचे स्पष्ट केले आहे.
आयपीएल फायनलसाठी बीसीसीआयने स्टेडियमवर एक हजार सैन्य अधिकारी, सैनिक आणि त्यांच्या कुटुंबीयांची बसण्याचीही व्यवस्था केली होती. तसेच मैदानावर असलेल्या स्क्रीनवर हिंदुस्थानच्या वीरगाथेचे दर्शनही घडवले जाणार होते. मात्र हे तिन्ही सेनाप्रमुख येणार नसल्याचे कळताच बीसीसीआयने आपल्या कार्यक्रमात बदल केला आहे. या सोहळय़ात प्रसिद्ध सिनेगायक देशभक्तिपर गाणी सादर करून उपस्थित लाखो क्रिकेटप्रेमींच्या उपस्थितीत हिंदुस्थानी सैन्याच्या शौर्याला मानाचा मुजरा करतील.
Comment List