मुंबईतील भायखळा येथे एका रहिवासी इमारतीच्या पाचव्या मजल्याचा काही भाग बुधवारी कोसळला. या दुर्घटनेत दोन महिला गंभीर जखमी झाल्या होत्या. यापैकी एकीची मृत्युशी झुंज अपयशी ठरली असून नायर रुग्णालयात उपचार सुरू असताना तिचा मृत्यू झाला, तर दुसरी महिला गंभीर जखमी झाली असून तिच्यावर उपचार सुरू आहेत.
नाजिया खान (वय – 35) असे मृत महिलेचे नाव असून खुशमा खातून असे उपचार सुरू असलेल्या महिलेचे नाव आहे, अशी माहिती बीएमसीने दिली.
भायखळा पश्चिम येथील बदलू रामगरी मार्गावरील अशरफी मंजिर या इमारतीच्या पाचव्या मजल्याचा काही भाग बुधवारी सायंकाळी पाचच्या सुमारास कोसळला. या दुर्घटनेमध्ये खुशमा खातून आणि नाजिया खान या दोन महिला जखमी झाल्या होत्या. इमारतीचा काही भाग कोसळल्याची माहिती मिळताच अग्निशमन दलाच्या जवानांनी, बीएमसी वॉर्ड कर्मचाऱ्यांनी घटनास्थळी धाव घेतली आणि जखमी महिलांना उपचारांसाठी नायर रुग्णालयात दाखल केले. नाजिया खान यांची प्रकृती गंभीर असल्याने त्यांना आयसीयूमध्ये ठेवण्यात आले होते. मात्र शुक्रवारी त्यांची प्राणज्योत मालवली. तर खुशमा यांची प्रकृती स्थिर असून त्यांच्यावर उपचार सुरू आहेत.
दरम्यान, ही इमारत 1969 पूर्वी बांधण्यात आली असून सेस श्रेणीत ठेवण्यात आलेली आहे. गेल्या दोन दिवसांपासून सुरू असलेल्या पावसामुळे इमारतीचा काही भाग कोसळल्याची शक्यता अधिकाऱ्यांनी वर्तवली आहे.
Comment List