किरकोळ भांडणातून कॅब चालकाला बोनेटवरून फरफटत नेले, मुंबई विमानतळावरील धक्कादायक घटना; व्हिडिओ व्हायरल

मुंबई आंतरराष्ट्रीय विमानतळावर धक्कादायक घटना समोर आली आहे. किरकोळ भांडणातून एका कॅब चालकाने दुसऱ्या चालकाला कारच्या बोनेटवर काही किमी अंतर फरफटत नेले. या घटनेचा व्हिडिओ सोशल मीडियावर व्हायरल झाला आहे. पीडिताच्या तक्रारीवरून पोलिसांनी आरोपी कॅब चालकाविरोधात गुन्हा दाखल केला. पोलिसांनी गाडी आणि चालक दोघांना ताब्यात घेतले आहे.

काय आहे प्रकरण?

मुंबई विमानतळावर बुधवारी मध्यरात्री भीमप्रसाद महंतो आणि जस्टिन जे या दोन कॅब चालकांमध्ये किरकोळ वाद झाला. यावेळी जस्टिन हा महंतो याच्या कॅबच्या बोनेटवर चढला. यानंतर महंतो कॅब सुरू केली आणि तो भरधाव वेगात वेस्टर्न एक्सप्रेस वे वर कॅब चालवत राहिला. यावेळी एका बाईकस्वाराने ही घटना मोबाईलमध्ये कैद केली.

व्हिडिओ व्हायरल झाल्यानंतर मुंबई पोलिसांनी कारवाईला सुरवात केली. यावेळी जस्टिनच्या तक्रारीवरून पोलिसांनी बीएनएस कलम 281, 125, 126(2), 115(2), 352 आणि एमव्ही अ‍ॅक्ट कलम 184 अंतर्गत गुन्हा दाखल केला आहे. पोलिसांनी वाहन जप्त केले आहे. तसेच आरोपीला बीएनएसएसच्या कलम 35(3) अंतर्गत नोटीस बजावण्यात आली आहे.