विदर्भातील चंद्रपूर मतदारसंघातून वनमंत्री सुधीर मुनगंटीवार यांची लोकसभा लढण्याची इच्छा नसताना उमेदवारी दिली आहे. त्यातच या मतदारसंघाचे चार वेळा प्रतिनिधित्व करणारे माजी खासदार हंसराज अहिर यांना उमेदवारी न मिळाल्याने पक्षांतर्गत धुसफुस सुरू झाली आहे. अहिरांची नाराजी मुनगंटीवार यांना भोवण्याची शक्यता राजकीय वर्तुळातून व्यक्त केली जात आहे.
मुनगंटीवार आणि अहिर यांच्यामध्ये फारसे सख्य नाही. 2019 च्या लोकसभा निवडणुकीत त्यांच्यातील सुप्त संघर्ष चव्हाटय़ावर आला होता. हंसराज अहीर हे केंद्रीय गृहराज्यमंत्री आणि चार टर्म खासदार असूनसुद्धा त्यांचा मोदी लाटेत मागील निवडणुकीत पराभव झाला होता. त्यामुळे त्यांच्या ते चांगलेच जिव्हारी लागले होते. यासंदर्भात एक जाहिरातच वृत्तपत्रात प्रसिद्ध करून यामध्ये कोणत्या विधानसभा मतदारसंघात किती मते कमी पडली याची माहिती त्यांनी दिली होती. मुनगंटीवार यांच्या बल्लारपूर विधानसभा मतदारसंघात सर्वाधिक कमी पडली होती. त्यामुळे अहिर आणि त्यांचे समर्थक आधीच मुनगंटीवार यांच्यावर नाराज आहेत. त्यात मुनगंटीवार यांनाच निवडणुकीच्या रिंगणात उतरविण्यात आल्याने अहिर आणि त्यांचे समर्थक कार्यकर्ते मुनगंटीवार यांच्या मागे उभे राहतील का,असा प्रश्न आहे.
अहिर समर्थकांना प्रचारात सक्रिय करण्याचे आव्हान
लोकसभेची उमेदवारी जाहीर झाल्यानंतर मुनगंटीवार यांच्यासाठी गांधी चौकात आशीर्वाद सभा झाली. यावेळी वणी, आर्णीचे आमदार तसेच भाजपचे सर्व प्रमुख पदाधिकारी, कार्यकर्ते उपस्थित होते. मात्र, अहिर आणि त्यांचे समर्थक उपस्थित राहिले नाहीत. अहिर यांचा जनसंपर्क दांडगा आहे. ते भाजपच्या ओबीसी सेलचे प्रमुख पदाधिकारी आहेत. भाजपला चंद्रपूरच्या जागेवर विजयी व्हायचे असेल तर अहिर यांची समजूत काढून त्यांना प्रचारात सक्रिय करण्याचे आव्हान भाजप नेत्यांपुढे आहे.
.jpeg)
Comment List