दररोज 3000 लोकांना अटक करा, ट्रम्प प्रशासनाचे अधिकाऱ्यांना आदेश; काय आहे कारण?

अमेरिकेचे राष्ट्राध्यक्ष डोनाल्ड ट्रम्प यांच्या प्रशासनाने बेकायदा स्थलांतरितांविरोधात कठोर कारवाईचा पवित्रा घेतला आहे. अमेरिकन न्यूज वेबसाइट अ‍ॅक्सिओसच्या वृत्तानुसार, ट्रम्प प्रशासनाने इमिग्रेशन अँड कस्टम्स एनफोर्समेंट (ICE) अधिकाऱ्यांना दररोज 3000 बेकायदा स्थलांतरितांना अटक करण्याचे आदेश दिले आहेत. हा आकडा ट्रम्प यांच्या दुसऱ्या कार्यकाळाच्या सुरुवातीच्या काळात केल्या जाणाऱ्या अटकांच्या तुलनेत तिप्पट आहे.

ट्रम्प प्रशासनातील वरिष्ठ सल्लागार स्टीफन मिलर आणि गृहसुरक्षा सचिव क्रिस्टी नोम यांनी गेल्या आठवड्यात झालेल्या बैठकीत आयसीई अधिकाऱ्यांना हे नवे लक्ष्य साध्य करण्यास सांगितले. वृत्तानुसार, सीमावर्ती भागातील स्थलांतरितांचे प्रमाण कमी झाले असले तरी, देशांतर्गत गैर-सीमावर्ती समुदायांमध्ये अटकेची कारवाई तीव्र करण्यात येत आहे. यामुळे बेकायदा स्थलांतरितांना देशातून बाहेर काढण्याच्या ट्रम्प यांच्या धोरणाला गती मिळणार आहे.

दरम्यान, या नव्या धोरणामुळे अमेरिकेतील स्थलांतरित समुदायांमध्ये चिंतेचे वातावरण आहे. तसेच या कारवाईला कायदेशीर आव्हाने मिळण्याची शक्यता आहे. कारण ट्रम्प यांनी यापूर्वी घेतलेल्या अनेक स्थलांतरविरोधी निर्णयांना न्यायालयात आव्हान देण्यात आले होते.