स्वतः च्या गाडीवर घडवून आणला गोळीबार, मिंधेंच्या पदाधिकार्‍याला अटक

पोलीस संरक्षण आणि शस्त्र परवाना मिळविण्यासाठी स्वतः च्या गाडीवर गोळीबार घडवून आणण्याऱ्या मिंधेंच्या युवा सेनेच्या जिल्हाध्यक्षाला वारजे पोलिसांनी अटक केली आहे. त्याने स्वतःच्या मोटारीवर गोळ्या झाडल्याचा कट रचल्याचे तपासातून उघडकीस आले आहे. ही घटना १९ मे रोजी बाराच्या सुमारास वारजे माळवाडी भागात घडली होती. निलेश राजेंद्र घारे असे अटक केलेल्या मिंध्येच्या जिल्हाध्यक्षाचे नाव आहे.याप्रकरणी सचिन गोळे, शुभम खेमणार आणि अजय उर्फ बगली सकपाळ यांनाही नुकतीच पोलिसांनी अटक केली होती. त्यांचा साथीदार संकेत मातले हा फरार असून वारजे पोलिसांकडून त्याचा शोध घेत आहेत.

पुणे जिल्हा युवासेना जिल्हाप्रमुख निलेश राजेंद्र घारे यांच्या वाहनावर अज्ञाताने १९ मे रोजी रात्री बाराच्या सुमारास वारजे माळवाडी भागात गोळीबार केला होता. घारे यांचे येथील गणपती माथा परिसरामध्ये जनसंपर्क कार्यालय असून, ते कार्यालयात सहकार्‍यांना भेटण्यासाठी गेले होते. त्यावेळी दुचाकीवर आलेल्या दोन अज्ञातांनी त्यांच्या गाडीवर गोळीबार केला. सुदैवाने घारे हे गाडीत नसल्याने त्यांना दुखापत झाली नव्हती. याप्रकरणी वारजे पोलिसांसह गुन्हे शाखेचे पथकांनी तपासाला गती दिली. रविवारी (दि. २५) रात्री उशिरा वारजे पोलिसांनी वारजे भागातून तिघांना ताब्यात घेतले. चौकशीत त्यांनी हा सगळा प्रकार घडवून आणल्याची कबुली दिली. विशेष म्हणजे निलेश घारे यांनीच गोळीबार करायला लावल्याचा धक्कादायक खुलासाही त्यांनी केला.

त्यानुसार कटाचा मुख्य सूत्रधार असल्याप्रकरणी पोलिसांनी जिल्हाध्यक्ष घारे याला अटक केली आहे. पोलीस संरक्षण मिळावे यासाठी त्यांनीच हा गोळीबार घडवून आणला आहे. स्वत: निलेश घारे यांनी स्वतःच्या गाडीवर गोळीबाराचा डाव रचल्याची माहिती पोलिस तपासातून उघडकीस आली आहे. पोलिस संरक्षण मिळावे आणि शस्त्र परवाना मिळावा यासाठी स्वतःच्या गाडीवर त्यांनीच गोळीबार घडवून आणला असल्याचे स्पष्ट झाले असल्याची माहिती वारजे पोलिसांनी दिली आहे.