स्विस ओपन बॅडमिंटन  – सिंधू, सेन पराभूत; श्रीकांत, राजावतची आगेकूच

दोन वेळची ऑलिम्पिक पदकविजेती पी.व्ही. सिंधू व झुंजार खेळाडू लक्ष्य सेन या हिंदुस्थानी खेळाडूंचे स्विस ओपन बॅडमिंटन स्पर्धेतील आव्हान उपउपांत्यपूर्व फेरीतच संपुष्टात आले. मात्र किदाम्बी श्रीकांत व प्रियांशू राजावत यांनी विजयासह उपांत्यपूर्व फेरीत आगेकूच केली.

पी.व्ही. सिंधूला उपउपांत्यपूर्व फेरीत जपानच्या टोमोका मियाजाकी हिने 16-21, 21-19, 21-16 असे हरवले. ही चुरशीची लढत एक तास 19 मिनिटांपर्यंत रंगली. सिंधूने पहिला सेट जिंकून झकास सुरुवात केली होती. मात्र त्यानंतर पुढील दोन सेट गमावल्याने तिचे आव्हान संपुष्टात आले. पुरुष एकेरीत लक्ष्य  सेनला चिनी तैपेईच्या चिया हाओ ली याने 21-17, 21-15 असे पराभूत केले.

पुरुष एकेरीत 27व्या मानांकित किदाम्बी श्रीकांतने स्पर्धेतील अव्वल मानांकित मलेशियाच्या ली जी जिया याचा 21-16, 21-15 असा सरळ सेटमध्ये धुव्वा उडवून उपांत्यपूर्व फेरीत धडक दिली. दुसरीकडे प्रियांशू राजावतने चीनच्या लेई लांक्सी याचे आव्हान 21-14, 21-13 असे सहज मोडून काढत आगेकूच केली. प्रियांशने केवळ 38 मिनिटांत ही लढत संपवली.

महिला दुहेरीत त्रिशा जॉली व गायत्री गोपीचंद या हिंदुस्थानी जोडीने आपल्याच देशाच्या प्रिया-श्रुती मिश्रा या जोडीचा 21-10, 21-12 असा सहज पराभव करीत आगेकूच केली.