शरथ कमल हिंदुस्थानी पथकाचा ध्वजवाहक, मेरी कोम ऑलिम्पिक मोहिमेची प्रमुख

या वर्षी होणाऱ्या पॅरिस ऑलिम्पिकसाठी फ्रान्स जय्यत तयारी करत आहे. खेळाडूंचीही या स्पर्धेसाठी जोरदार तयारी सुरू आहे. या पार्श्वभूमीवर हिंदुस्थानचा अनुभवी टेबल टेनिसपटू शरथ कमल याला हिंदुस्थानी पथकाचा ध्वजवाहक होण्याचा मान देण्यात आला आहे. याचबरोबर ऑलिम्पिक पदकविजेती बॉक्सर एम.सी. मेरी कोम हिला हिंदुस्थानच्या ऑलिम्पिक मोहिमेचे प्रमुख बनविण्यात आले आहे.

हिंदुस्थान ऑलिम्पिक असोसिएशनने (आयओए) ही माहिती दिली. दरम्यान, ऑलिम्पियन शिवा केशवनला हिंदुस्थानच्या ऑलिम्पिक मोहिमेचे उपप्रमुख पद देण्यात आले आहे. ‘‘खेळासाठी मेरी कोमने दिलेल्या अतुलनीय समर्पणामुळेच तिची निवड ऑलिम्पिकमध्ये आमच्या खेळाडूंना मार्गदर्शन करण्यासाठी करण्यात आली आहे. केशवननेही ल्यूग क्रीडा प्रकारात ऑलिम्पिकमध्ये हिंदुस्थानचे प्रतिनिधित्व केले आहे. त्यामुळे त्याचा अनुभव आणि ज्ञान संघव्यवस्थापनाला मदतगार ठरेल,’’ असे ‘आयओए’ने म्हटले आहे.

याचबरोबर ऑलिम्पिक पदकविजेता गगन नारंगने शूटिंग रेंजमध्ये हिंदुस्थानचे व्यवस्थापन पाहिले. कारण शूटिंग रेंज स्पर्धेच्या मुख्य ठिकाणापासून बरीच लांब आहे. हिंदुस्थानला नेमबाजीत 19 ऑलिम्पिक कोटा मिळाला आहे. त्यामुळे हे हिंदुस्थानचे नेमबाजीतील सर्वात मोठे पथक असणार आहे.

ऑलिम्पिक मोहिमेसाठी महत्त्वाच्या पदावर नेमणूक करताना खेळाडूंचा अनुभव, काwशल्य आणि नेतृत्वगुण यांचा विचार करण्यात आला आहे, अशी माहितीही हिंदुस्थान ऑलिम्पिक असोसिएशनने पत्रात दिली आहे.