‘बिग बॉस’ फेम अभिनेत्रीच्या घरात चोरी; बहिणीच्या लग्नासाठी साठवलेले पैसे लंपास, 30 तासांनंतरही कारवाई नाही

‘बिग बॉस 11’मध्ये स्पर्धक म्हणून सहभागी झालेली आणि प्रसिद्ध टीव्ही अभिनेत्री बंदगी कालराच्या घरी चोरीची घटना घडली आहे. बंदगीच्या घरातून मौल्यवान वस्तू आणि रोख रक्कम चोरीला गेली आहे. याविषयीची माहिती तिने इन्स्टाग्राम पोस्टद्वारे दिली आहे. बहिणीच्या लग्नाच्या काही दिवस आधी ही चोरी झाली असून लग्नासाठी जमवलेले पैसे आणि दागिने चोराने लंपास केल्याचं तिने म्हटलंय. बंदगीने तिच्या सोशल मीडियावर घराच्या दरवाजाचे फोटोसुद्ध शेअर केले आहेत. यामध्ये तिच्या घराचा लॉक तुटलेल्या अवस्थेत पहायला मिळत आहे. घरात बहिणीच्या लग्नाची तयारी सुरू असताना चोरीची मोठी घटना घडल्याने बंदगी मानसिक आणि भावनिकदृष्ट्या खचली आहे. इन्स्टाग्रामवरील पोस्टद्वारे तिने भावना व्यक्त केल्या आहेत.

‘काल मी माझ्या घरी आले तेव्हा चोराने संपूर्ण घर उद्ध्वस्त केल्याचं पाहिलं. बऱ्याच वैयक्तिक वस्तू, पैसे चोरीला गेले आहेत. बहिणीच्या लग्नासाठी मी घरात बरीच कॅश ठेवली होती. एसडी कार्डसोबत कॅमेरासुद्धा चोरीला गेला आहे. माझ्या घराचे दोन्ही गेट तोडले गेले आहेत. एवढं सगळं होऊनही कोणाला याची कानोकान खबर लागली नाही’, असं तिने लिहिलंय. याविषयी पोलिसांत तक्रार केली असता पोलिसांकडून अद्याप योग्य ती कारवाई झाली नसल्याचा आरोपही तिने केलाय.

‘मी चोरीच्या घटनेची पोलिसांना माहिती देऊन आता जवळपास 30 तास उलटले आहेत. ज्या प्रकारे गोष्टी घडतायत किंवा घडत नाहीयेत, ते पाहून मला असहाय्य वाटतंय. दोन दिवस उलटूनही त्यांनी अद्याप याप्रकरणी कोणतीच कारवाई केली नाही. ही अत्यंत लाजिरवाणी गोष्ट आहे. कुठलाच तपास नाही, लोकांना जबाबासाठी बोलावलं नाही, सीसीटीव्ही कॅमेरे तपासले गेले नाहीत. मला मदतीची गरज आहे. ते कसली प्रतीक्षा करतायत मला माहीत नाही. जेव्हा माझा वैयक्तिक डेटा लीक केला जाईल, तेव्हा ते कारवाई करतील का’, असा संतप्त सवाल तिने केला आहे.

 

View this post on Instagram

 

A post shared by Bandgee Kallra (@bandgeekallra)

बंदगीने आणखी एका इन्स्टाग्राम स्टोरीमध्ये लिहिलंय, ‘मला कधीच इतकं असहाय्य वाटलं नाही. ज्या पद्धतीने गोष्टी सुरू आहेत किंवा काहीच सुरू नाही असं म्हणावं लागेल. मला आता त्यांच्या प्रामाणिकपणावर आणि कामाबद्दलच्या हेतूंवर शंका येऊ लागली आहे. मी आपल्या व्यवस्थेबद्दल खूप निराश आहे. मला याबद्दल आधीही कल्पना होती. पण आता मी स्वत: त्याचा सामना करतेय. मग लोक विचारतात की तुम्हाला भारत का सोडायचा आहे?’

बंदगी कालराने बिग बॉसच्या अकराव्या सिझनमध्ये स्पर्धक म्हणून भाग घेतला होता. या शोमध्ये तिच्या आणि पुनीत शर्मा यांच्यात अफेअर असल्याच्याही चर्चा होत्या. शो संपल्यानंतरही दोघं एकमेकांसोबत दिसले. परंतु जुलै 2023 मध्ये त्यांचं ब्रेकअप झालं.