केरळ व्हाया महाराष्ट्र पावसाचे धुमशान! राजधानीलाही वादळी पावसाने झोडपले

देशामध्ये मान्सून वेळेआधीच दाखल झाला आहे. यामुळे केरळमध्ये मुसळधार पावसाचा रेड अलर्ट जारी करण्यात आला आहे. महाराष्ट्राला सध्याच्या घडीला पावसाने चांगलेच झोडपून काढले आहे. दिल्ली एनसीआरमध्ये वादळासह मुसळधार पाऊस, केरळपासून महाराष्ट्रापर्यंत परिस्थिती गंभीर असून, महाराष्ट्रातील पाच जिल्ह्यांना यलो अलर्ट देण्यात आला आहे.

केरळपासून महाराष्ट्र आणि गोव्यापर्यंत मुसळधार पावसामुळे परिस्थिती नियंत्रणाबाहेर गेली आहे. हवामान खात्याचा इशारा पूर्णपणे खरा ठरला असून, सोमवारी पहाटेपासून पडणाऱ्या पावसाने मुंबईकरांची तारांबळ उडाली आहे. अरबी समुद्रातील कमी दाबामुळे आणि केरळमध्ये नैऋत्य मान्सूनचे वेळेवर आगमन झाल्यामुळे, देशातील काही भागांमध्ये मुसळधार पाऊस पडत आहे. भारतीय हवामान विभागाने (IMD) अनेक जिल्ह्यांमध्ये मुसळधार ते अतिमुसळधार पावसाचा अंदाज वर्तवला आहे. महाराष्ट्र आणि गोव्यासाठीही इशारा देण्यात आला आहे. प्रशासनाला सतर्क राहण्याचा सल्ला देण्यात आला आहे आणि सामान्य जनतेला गरज असेल तरच बाहेर पडण्याचा सल्ला देण्यात आला आहे.

स्कायमेट वेदरनुसार, पुढील 24 तासांत विदर्भ, मराठवाडा, कोकण आणि गोवा, दक्षिण मध्य महाराष्ट्र, किनारी कर्नाटक आणि केरळमध्ये हलका ते मध्यम पाऊस पडू शकतो आणि काही ठिकाणी मुसळधार पाऊस पडू शकतो. बिहार, झारखंड, छत्तीसगड, आग्नेय मध्य प्रदेश, तेलंगणा आणि अंदमान-निकोबार बेटांवर हलका ते मध्यम पाऊस पडण्याची शक्यता आहे. एक किंवा दोन ठिकाणी मुसळधार पाऊस पडण्याची शक्यता आहे. सिक्कीम, पश्चिम बंगाल, ईशान्य भारत, ओडिशा, आंध्र प्रदेशचा किनारी भाग आणि अंतर्गत कर्नाटकमध्ये 40 ते 50 किमी प्रतितास वेगाने जोरदार वारे आणि वादळ येऊ शकते. हिमाचल प्रदेश, उत्तराखंड, उत्तर प्रदेश आणि लक्षद्वीपमध्ये हलका ते मध्यम पाऊस आणि गडगडाटी वादळ शक्य आहे.

नैऋत्य मान्सून केरळमध्ये नियोजित वेळेपूर्वी 24 मे रोजी दाखल झाला आहे. त्याची सामान्य तारीख 1 जून होती. त्याच वेळी, पूर्व-मध्य अरबी समुद्र आणि लगतच्या दक्षिण कोकण किनाऱ्यावर कमी दाबाचे क्षेत्र कायम आहे. ते पूर्वेकडे सरकण्याची आणि दक्षिण किनारपट्टी महाराष्ट्र ओलांडण्याची शक्यता आहे. आयएमडीनुसार, पुढील 7 दिवस पश्चिम किनारपट्टीवर (केरळ, कर्नाटक, महाराष्ट्राचा किनारी भाग आणि गोवा) मुसळधार ते अतिमुसळधार पाऊस पडण्याची शक्यता आहे.