IPL 2024 : हे तीन खेळाडू पहिल्यांदाच दिसणार कर्णधारपदाच्या भुमिकेत…

आयपीएल 2024 चा धमाका आजपासून (22 मार्च 2024) सुरू होणार आहे. आयपीएलचा 17 वा हंगाम इतर हंगामांपेक्षा विशेष ठरणार आहे. कारण नवीन कर्णधारांच्या नेतृत्वाखाली सहा संघ मैदानात शड्डू ठोकून उतरणार आहेत. बंगळुरुचे एम. चिन्नास्वामी स्टेडीयम आयपीएलच्या 17 व्या हंगामासाठी सज्ज झाले असून ऋतुराज गायकवाडच्या नेतृत्वात चेन्नई तर फाफ डु प्लेसिसच्या नेतृत्वात बंगळुरू यांच्यामध्ये सलामीचा सामना रंगणार आहे.

आयपीएलच्या विजेतेपदासाठी 10 संघ आपआपसात भिडतील. विशेष म्हणजे 10 संघांपैकी 6 संघांनी आपले कर्णधार बदलले आहेत. तर तीन कर्णधार हे पहिल्यांदाच आयपीएलमध्ये संघाचे नेतृत्व करताना पहायला मिळणार आहेत. आयपीएल सुरू होण्यापूर्वी कोलकाता नाइट रायडर्स, दिल्ली कॅपिटल्स, चेन्नई सुपर किंग्ज, मुंबई इंडियन्स, सनरायजर्स हैदराबाद आणि गुजरात टायटन्स यांनी आपले कर्णधार बदलले आहेत. कोलकाताने यंदा नितीश राणाच्या ऐवजी श्रेयस अय्यरवर विश्वास दाखवत त्याला कर्णधार पद सोपवले, त्यामुळे पुन्हा एकदा श्रेयसवर कर्णधारपदाची जबाबदारी आली आहे. दिल्ली कॅपिटल्सने डेविड वॉर्नरच्या जागी ऋषभ पंतवर संघाची धुरा सोपवली आहे. तर सनरायजर्स हैदराबादने पॅट कमिंन्स, चेन्नई सुपरकिंग्जने ऋतुराज गायकवाड, मुंबई इंडियन्सने हार्दिक पांड्या आणि गुजरातने शुभमन गिलकडे कर्णधार पदाची जबाबदारी दिली आहे.

सहा नवीन कर्णधार आयपीएलच्या या हंगामाध्ये पाहायला मिळणार आहेत. तर पॅट कमिंन्स, शुभमन गिल आणि ऋतुराज गायकवाड हे तीन खेळाडू पहिल्यांदाच संघाचे नेतृत्व करताना पाहायला मिळणार आहेत. या तीन खेळाडूंमध्ये पॅट कमिंन्स हा सर्वात अनुभवी कर्णधार आहे. ऋतुराज गायकावडच्या नेतृत्वात टीम इंडीयाने 2023 मध्ये आशियाई क्रिडा स्पर्धांमध्ये सुवर्णपदक जिंकले होते.