गडचिरोलीतील महाराष्ट्र-छत्तीसगड सीमेवर विशेष कमांडो युनिट सी-60 आणि केंद्रीय रिझर्व्ह पोलीस दल (सीआरपीएफ) यांनी शुक्रवारी नक्षलवाद्यांविरोधात संयुक्त मोहीम राबवली. यादरम्यान सुरक्षा दल आणि नक्षलवाद्यांमध्ये चकमक झाली. या चकमकीत सुरक्षा दलाने चार नक्षलवाद्यांचा खात्मा केला. महाराष्ट्र-छत्तीसगड सीमेवरील कवंडे परिसरात अलीकडेच स्थापन झालेल्या फॉरवर्ड ऑपरेटिंग बेस (एफओबी) जवळ ही चकमक झाली.
एका वरिष्ठ अधिकाऱ्याने दिलेल्या माहितीनुसार, महाराष्ट्र-छत्तीसगड सीमेवरील कवंडे परिसरात मोठ्या संख्येने नक्षलवादी लपल्याची माहिती गुरुवारी सुरक्षा दलाला मिळाली. मिळालेल्या माहितीच्या आधारे सी-60 कमांडो आणि सीआरपीएफ जवानांच्या 12 पथकांनी कवंडे आणि नेलगुंडा भागात सर्च मोहीम सुरू केली.
यानंतर शुक्रवारी सकाळी सुरक्षा दलांनी इंद्रावती नदीकाठाला घेराव घालण्यास सुरुवात केली असता नक्षलवाद्यांनी त्यांच्यावर अंदाधुंद गोळीबार सुरू केला. प्रत्युत्तरादाखल सुरक्षा दलांनीही गोळीबार केला. सुमारे दोन तास चाललेल्या या चकमकीत चार नक्षलवाद्यांना कंठस्नान घातले. घटनास्थळावरून एक स्वयंचलित सेल्फ-लोडिंग रायफल, दोन .303 रायफल, एक बंदूक, वॉकी-टॉकी सेट, कॅम्पिंग साहित्य आणि नक्षलवादी साहित्यासह अनेक आक्षेपार्ह वस्तू जप्त करण्यात आल्या.
Comment List